Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1351_1

<begin>
Wj jacob gherits soen ende heynric jans soen scepene in aemstelredamme orconden ende kennen
</begin>
<main>
dat quam voer ons adaem die zael ende gaf daer tot enen vrien eyghen gherit bancman twe scepene brieve enen sprekende op symon ruusschen soen van twe ende viertich ponden ende tien scellinghe hollants die adaem voer symon ghelouet hadde ment claes ments soen voert enen anderen brief sprekende dat adaem den zalen gheeyghent is met allen rechte die helfte vanden erue ende huse dat gheheten is haren roemers zate also alst symon ruusschen soen legghende hadde tusschen albrecht vechters soens erue op die een zide ende diric gherit soens erue op die ander zide alse voer die twe ende viertich pont ende tien scellinghe hollants [voer] die pande den derden penning betervoert ghelouede adaem gheride voerseyt dat halue [erue] voerghenoemt iaer ende dach te waren alsmen erue ende eyghen sculdich is te waren ende waer dat gherit daer enighen scade bi leede iofte hinder dien soude hem adaem op rechten ende verbeteren
</main>
<end>
jn orconde desen brieue bezeghelt mit onsen zeghelen Ghegheuen inden jare ons heren mccc een ende vijftich des donresdaghes na sente victoers dach
</end>