Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1355_1

<begin>
Wj dirc coppen soen ende pouwels jans soen Scepene in aemstelredamme orconden ende kennen
</begin>
<main>
dat Ghisetgijn bil gheliede voer ons dat hi vercoft heeft den oudermans van onser vrouwen capelle tot onser vrouwen capelle behoef in die wijnmolen strate drie pont hollants an comans ghelde iaerlicser rente staende tot enen eweliken pacht op dat huus ende op dat erue dat gheleghen is ane heydewijn heynemans soens erue op die noert zide ende ane jan scrapers erue op die zuutzide tebetalen alle jare desen voerscreuen pacht op sinte johans dach te middezomer achte daghe daer na onbegrepen ende waer dat zake dat ghisetgijn bil desen voerseyden pacht jaerlix niet en betaelde als voerseyd is ende die oudermans van onser vrouwen capelle om dien pacht panden so soude [ghiisetgijn] bil den oudermans voerseyd den derden penning meer gheuen
</main>
<end>
jn orconde desen brieue bezeghelt mit onsen zeghelen Ghegheuen jnden jare ons heren mccc viue ende vijftich des donresdaghes na sinte martijns dach tiislatio
</end>