Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1360_1

<begin>
Wj meynse grieten soen ende jonghe jan die witte Scepene in aemstelredamme orconden ende kennen
</begin>
<main>
dat voer ons quamen claes pieters soen han wigghers zvagher ende nanninc outghers soen oudermans van onser [vrouwen] [capelle] die staet jn die wiimmolen strate ende ghauen ouer van onser vrouwen capelle weghen voerseit aernt braseman tot eenen vryen eyghen eenen scepene brief sprekende van drien pont hollants coemans ghelts jaerlixer renten toten eeweliken pachte op ghiistgin bils erue dat gheleghen is tvisschen den erue dat boyden heynemans soen plach toe te behoeren ende nv toe behoert adaem den zalen optie een zide ende den erue dat toe te behoeren plach jan den scraper ende nv toe behoert claes aernts soen op tander zide gheliker wiis als die propere brief daer of inhout dien die oudermans voerseyt aernde voerscreuen ouer ghegheven hebben ende si ghelieden daer of tot onser vrouwen capelle behoef voernoemt al betaelt den lesten penninc mitten eersten
</main>
<end>
jn orconde desen brieue beseghelt mit onsen seghelen Ghegheuen jnden jare ons heren mccc ende tsestich des vridaghes na sinte johans dach baptista
</end>