Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1360_2

<begin>
Alle den ghenen die desen brief zullen zien jof hoeren lesen Make wj scoute scepene ende Raet der poerten van Aemstelredamme cont ende kenlic
</begin>
<main>
dat voer ons quamen ysebrant Aernts soen Egbrecht pillegrams soen ende claes Aernts soen goedshuus beraders der prochikerken onser stede voerscreuen ende ghelieden dat si ontfaen hebben bi concente ende wille haren gheriids herten ons cureyts der kerken voernoemt ende den onsen toter seluer kerken behoef van herbaren van foreeste vier pont hollants an coemans ghelde voer wilke ysebrant egbrecht ende claes voernoemt gheloueden vander kerke goede voerseyt voer him ende voer die ghene die namaels goedshuus beraders wesen zullen vyttereeken ende te gheuene vander kerke goede voerseyt tot eewighen daghen alle jare opten elften dach der maent van junio alst haren jans bloeten jarichtiit is die wilenneer onse cureyt was wes zielen god ghenedich ende ghedenkich moet siin viif groete des voerscreuens payments den cureyt waer hi is ende den ghemeenen priesteren die dan in Aemstelredamme woenachtich zullen siin ende die haren jans bloeten jarichtiit hulpen begaen alse des auonts jnder vigilien ende des morghens ende die evenghelike onder him allen te deelen voert soe gheloueden die goedshuus beraders voernoemt tvie kaersen van wasse te setten ende te berechten vans goedshuus weghen jn die eere goeds ende jn haren jans zielen ghedenkenisse des auonts te vigilien ende des morghens jnder zielmissen zine jaerichtiit mede te beghane ende waer dat sake dat ghiene der priesteren voerscreuen tot deser jaerichtiit en quamen noch en daden alse voerscreuen is vytghenomen noetsake van jnterdicts soe zouden die goedshuus beraders die dan wesen zullen optie tiit dese viif grote gheuen jn die eere goeds ende om haren jans zielen willen den armen huussittende daert him best an bestaet donken sel ende dit zullen die goedshuus beraders alse langhe doen totter tiit toe dattie papen haren jans jaerichtiit weder annemen ende doen alse voerscreuen is
</main>
<end>
Ende om dat alle deze voerscreuen saken vaste ende ghestade bliuen zullen soe heb jc gheriid die hert priester cureyt der kerken van Aemstelredamme ende wj Scoute Scepene ende Raet der seluer stede desen brief beseghelt mit minen ende onser stede seghelen Ghegheuen des dinghesdaghes na sinte odulfs dach jnden jare ons heren mccc ende tsestich
</end>