Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1361_1

<begin>
Wi heyn koc ende heynric dircs soen Scepene in Aemstelredamme orconden ende kennen
</begin>
<main>
dat voer ons quamen lobberich coppelanen wiif was mit godeuart hoeren soen hoeren mombaer ende wouter laen ende broedertgiin hoer tvie zonen ende ghauen mit ghesamenderhant eenen vryen eyghendoem den prouisoers van den cruce broeders toter heyligher stede vanden verndel vanden huse ende erue dat matte wouters plach toe te behoeren ende gheleghen is tvisschen heynric iacops soens erue optie een zide ende willam hanics erue op tander zide ende si ghelieden daer of al betaelt den lesten penninc mitten eersten voert soe gheloueden si den prouisoers voerscreuen dit verndel vanden voerscreuen huse ende erue vry te waren iaer ende dach als men vry erue ende eyghen scoudich ist waren ende alle oude brieue of te nemen sonder die brieue die han woudiken soen sprekende heeft van zinen pachte vanden huse ende erue voerscreuen
</main>
<end>
In orconde desen brieue beseghelt mit onsen seghelen Ghegheuen inden iare ons heren een ende tsestich op sinte lourens auonde
</end>