Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1367_1

<begin>
Wj Gheriit jans soen van wormer scoute claes hermans soen ende ian ians soen scepene in aemstelredamme orconden ende kennen
</begin>
<main>
dat voer ons quamen jnt gherechte make sniueghe an die een zide jan ende gheriit claes corstans soens tvie soenen an die ander zide ende verteghen daer van malcander in dezer maniere dat jan ende gheriit voerseyt hebben zullen voer hoers vaders erue den voerwerf die claes corstans soen maecte in die Aemstel neffens ziere hofstede daer hi op plach te woenen ende dat land dat hi loefde ouer die grafte inden nesse ende daer mede soe scouden si quiit alle die erffenisse die him aenbesterf van hoeren vader voert soe verteech make voerseyt van alberde van claese ende van hillen zinen drien stiepkiinderen ende daer waeren an ende ouer der kiinder mombaer ende vier verndel alse dattie kiinder hebben zullen die helfte vanden huse ende erue dat gheleghen is tvisschen ian vander molen erue optie een zide ende han brunen erue optie ander zide ende make voerseyt sel hebben die ander helfte ende hier mede ende mitten voerscreuen voerwerde soe wert dit vertich ghewiist mit rechte ende mit vonnisse stade ende vast te bliuen
</main>
<end>
jn orconde desen brieue beseghelt mit onsen seghelen ghegeuen op sinte mathiis auont int iaer ons heren mccc seuen ende tsestich
</end>