Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1371_3

<begin>
Wj Jan dier vrancke dircs soen ziman abbe pieters soen heynric moelnaer willam noert pieter hollant ende alsteen iacops soen Scepene in aemstelredamme orconden ende kennen
</begin>
<main>
dat voer ons quamen die provisoers ende bewares vander heyligher stede binnen aemstelredamme ende ghelieden dat si vercoft hebben bi goetdoncken des ghemeen gherechts vander stede voerseyt den gasthuse binnen aemstelredamme den heylighen wech op ghaende egghen ende eynden lant ende sloet alsoe alse [sy] [daer] nv begraven ende leghen is alsoe alsen die heylighe stede daer legghende heeft mit den lande dat die heylighe stede legghende heeft in dat naeste weer op die zuutzide vanden heylighen wech voerseyt op ghaende vander aemstel tot sloeten [rechtoe] ende si ghauen den gasthuse voerseyt vanden heylighen wech ende lande voerscreuen eenen vrieneyghendoem ende ghelieden vol ende al betaelt den lesten penninc mitten eersten Ende hiert voer soe ghelouen die overmans vanden gasthuse vandes ghasthuus weghen voerseyt weder te bewaren den heylighen wech te maken jof te vermaken tot eeuwighen daghen jn allen manieren alse men te makene pleecht dat men vrilike op ende neder wanderen mach bi goetdoncken vanden gherechte van aemstelredamme
</main>
<end>
jn orconde desen brieue beseghelt mit onsen seghelen ghegheuen des woensdaghes nades heylighen kersdach jnt iaer ons heren mccc een ende tseuentich
</end>