Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1390_1

<begin>
Wj dirc zael jacops soen ende jacop ghisebrecht soen scepene in aemstelredamme orconden ende kennen
</begin>
<main>
dat voer ons quamen die goedshuus beraders vander kercke van aemstelredamme alse meyster willam willams soen dirc piil Godevaert hoesschen soen albert ghiistgins soen ende jan willams soen ende ghauen eenen vrien eyghendoem bi goetdoncken den gherechte vander stede voerseyt den ouermans vanden ghilde daer die sniders sceerres ende die coemans in hoeren alse tot des ghilden behoef voerseyt van een derndeel van eenen ouden vrancriicschen scilde jaerlixse renten die wilke staen zullen totten eeweliken pachte op dat huus ende erue gheleghen in die kerckstrate tvisschen jan adams soens erue op die een zide ende die strate die men ghaet opdie oude brugghe op die ander zide streckende vander straten alse verre alse doede roeterts soens erue daer gheleghen is doe hi in sinen lesten liue was wilke doede voerseit dese voerscreuen renten voerseyt besprac der kercken voerseyt vries ghelts ende sonder eenigherhande ofbrec alse die goedshuus beraders voerseyt voer ons ghetughet hebben te bitalen alle jaere dese voerscreuen renten tot meye ende si ghelieden daer of vol ende al betaelt den lesten penninc mitten eersten voert soe gheloueden die goedshuus beraders voerseit bi goetdoncken den gherechte voerseyt den ouermans vanden ghilde voerseyt tot des ghilden behoef voerseyt dese voerscreuen renten te waren jaer ende dach alse men erue ende eyghen scoudich is te waren ende alle oude brieue ofte nemen
</main>
<end>
jn orconde desen brieue beseghelt mit onsen seghelen Ghegheuen des woensdaghes na den heylighen dertienden dach jnt jaer ons heren mccc ende tneghentich
</end>