Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1390_2

<begin>
Wj heynric van muden ende willam reyners soen scepene in Aemstelredamme orconden ende kennen
</begin>
<main>
dat voer ons quamen die ouermans van sinte pieters ghilde alse Jan meynsen soen Jan [kunssche] thaems vincke ende Jan egberts soen ende ghelieden dat si ghehuert hebben tottes ghilden behoef voerseyt jeghens claes pieter kibben soen ende luduwen siinre zuster mit pieter kibben hoeren vader hoeren monbaer die husinghe ende erue gheleghen jn gansoerde tvisschen sinte pieters erue opdie een zide ende Jan kuusschen erue opdie ander zide streckende vander straten totter graften toe totten eweliken pachte Jaerlixse om dertien dordrechtsche scilde alse men nv ter tiit tot dordrecht slaet goet van goude ende zwaer van ghewichten Jof payment dat also goed is vries ghelts ende sonder enigherhande ofbrec wtgheset des heeren tynse te bitalen alle jare dese huere voorseyt die een helfte tot heylighemisse ende die ander helfte tot meye voert soe ghelieden claes pieter kibben soen voerseyt ende luduwe siin zuster mit pieter kibben hoeren vader hoeren monbaer voerseyt dat luduwen voerseyt van desen voerscreuen pachte van hoeren deel vander husinghe ende erue voerseyt viif dordrechtsche scilde jaerlixe totten eweliken pachte voert soe ghelieden claes pieter kibben soen voerseyt luduwe siin zuster mit pieter kibben hoeren vader hoeren monbaer voerseyt alse claes pieter kibben soen voerseyt steruet dat dan dat ghilde voerseyt enen dordrechtschen scilt jaerlixe renten van desen pachte of corten zullen ende behouden ende alse luduwen voerseyt steruet soe sel dat ghilde voerseyt oec enen dordrechtschen scilt jaerlixe renten van desen pachte voerseyt of corten ende behouden ende alse griete claes dochter voerseyt steruet soe sel dat ghilde voerseyt tvie dordrechtsche scilde jaerlixer renten van desen pachte ofcorten ende behouden ende soe en sel dit ghilde voerseyt na hoerre dryer doot voerseyt niet meer pachts wtgheuen van der husinghe ende erue voerseyt dan neghen dordrechtse scilde des jaers totten eweliken pachte vries ghelts
</main>
<end>
In orconde desen brieue beseghelt mit onsen seghelen Ghegheuen opten vier ende tvintichsten dach der maent van aprille jnt jaer ons heren m ccc ende tneghentich
</end>