Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1392_1

<begin>
Wi Ricout ians zoen ende symon die zael iacops zoen scepene in aemstelredamme orconden ende kennen
</begin>
<main>
dat voer ons quam gheertruut die ian symon didden zoens wijf was mit ian ians zoen hoeren zoen hoeren monbaer daer si mit rechte aen quam ende mit hoeren vier vierendelen alse mense naeste ghecrighen mochte alse Ruusch aernts zoen ruusch claes zoen dirc allert ende willam reyners zoen ende ghaf eenen vrien eyghendoem bi goetdoncken der Raed vander stede voerseyt albert dier ians zoen vanden achtendeel van vijf morghen lants tvie hondert myn die gheleghen zijn bider smaelre weesp twisken luuduwen ende hoerre kinder lande die ian witte ghisen zoens wijf was op die een zide ende lambert scoutgijns zoens lande op die ander zide Ende vanden achtendeel van drie morghen lants gheleghen tot muden in ian diuels lande In allen schijn als si dit voerscreuen lant bider smaelre weesp ende tot muden legghende heeft Ende ghelieder of voldaen ende betaelt den lesten penninc mitten eersten Voert zoe gheloefde gheertruut voerscreuen mit hoers monbaers hant voerseyt bi consente van hoeren vier vierendelen voerghenoemt albert dier voerseit Dit voerzeyde lant vri te waeren iaer ende dach alse men erue ende eyghen scoudich is te waeren ende alle oude brieue of te nemen wtghezet die lijftochts brieue die iacop vanden barghe opten voerghenoemden lande sprekende heeft
</main>
<end>
In orconde desen brieue bezeghelt mit onsen zeghelen ghegheuen opten neghenden dach der maent van aprille Int iaer ons heeren dusent driehondert tvie ende tneghentich
</end>