Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1392_2

<begin>
Wi Ricout ians zoen ende heyn noert scepene in aemstelredamme orconden ende kennen
</begin>
<main>
dat voer ons quam Jan claes zoen ende gheliede dat hi ghehuurt heeft ieghens pieter iacops zoen eenen tvune gheleghen twisken der zwesteren hof ende der aemstel tvie roeden breet ende achte roeden lanc behaluen den vaersloet ende den wech die voer den voerscreuen tvun leyt totten eeweliken pachte jaerlixe om twalof groete eenen goeden ouden vrancrijcschen scilt gherekent voer viertich groet jof ander payment dat alsoe goet is vries ghelts ende zonder eenigherhande of brec te betalen alle iare dese voerscreuen huure opten meye dach Voert zoe zel ian voerseyt den wech ende den sloet die voer den voerscreuen tvune leyt houden ende maken ghelike zinen bueren alse dat een yghelic die in pieter iacops zoens lande bruucweer heeft den voerzeyden wech ende sloet langhes orbaeren gaen ende varen mach mit eenre gheladenre scute Voert zoe gheliede pieter voerscreuen dat ian voerseit zel hebben eenen vrien ouerganc vander zwesteren brugghe die ouer die nuwe grafte leyt zuutwaert den wech langhes te gaen ende te bruken die twisken der nuwer graften leyt ende der zwesteren hof totten tvune toe voerseit Voert zoe gheloefde pieter voerseit dattie sloet die inder nuwer grafte gaet ende gheleghen is twisken baernt die stilganmakers lande op die een zide ende der zwesteren wech op die ander zide open zel bliuen eenen ygheliken zijn not daer duer te voeren Ende voert zoe zel ian voerseit helpen houden ende maken der zwesteren brugghe die ouer die nuwe grafte leyt alsoe verre alse hi daer toe vermaent wart ghelike zinen bueren die inden zeluen lande gheleghen zijn
</main>
<end>
In orconde desen brieue bezeghelt mit onsen zeghelen ghegheuen opten zesten dach der maent van meye Jnt iaer ons heeren dusent driehondert tvie ende tneghentich
</end>