Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1392_3

<begin>
Wie Ricout ians zoen ende heyn noert scepene in aemstelredamme orconden ende kennen
</begin>
<main>
dat voer ons quam pieter iacops zoen ende gheliede dat hi verhuurt heeft heyntgijn brunincs zoen eenen tvune gheleghen inden wttersten nesse bi der zwesteren hof twisken den tvune die ian claes zoen ghepacht heeft op die een zide ende den tvune die dirc pieters zoen ghepacht heeft op die ander zide vier roeden breet ende vijf roeden lanc behaluen den vaersloet ende den wech die voer den voerscreuen tvun leyt totten eeweliken pachte Jaerlixe om vijftien groete eenen goeden ouden vrancrijcschen scilt gherekent voer viertich groet Jof ander payment dat alsoe goet is vries ghelts ende zonder eenigherhande of brec te betalen alle iare dese voerscreuen huure opten meye dach Voert zoe zel heyntgijn voerseyt den wech ende den sloet die voer den voerscreuen tvune leyt houden ende maken ghelike zinen bueren alse dat een yghelic die in pieter iacops zoens lande bruucweer heeft den voerzeyden wech ende sloet langhes oerbaeren gaen ende varen mach mit eenre gheladenre scute Voert zoe gheliede pieter voerscreuen dat heyntgijn voerseyt zel hebben eenen vrien ouerganc vander zwesteren brugghe die ouer die nuwe grafte leyt zuutwaert den wech langhes te gaen ende te bruken die twisken der nuwer graften leyt ende der zwesteren hof totten tvune toe voerseyt Voert zoe gheloefde pieter voerseyt dattie sloet die inder nuwer grafte gaet ende gheleghen is twisken baernt die stilgancmakers lande op die een zide ende der zwesteren wech op die ander zide open zel bliuen eenen ygheliken zijn not daer duer te voeren Ende voert zoe zel heyntgijn voerseyt helpen houden ende maken der zwesteren brugghe die ouer die nuwe grafte leyt alsoe verre alse hi daer toe vermaent wart ghelike zinen bueren die inden zeluen lande gheleghen zijn
</main>
<end>
In orconde desen brieue bezeghelt mit onsen zeghelen ghegheuen opten zeuen ende twintichsten dach der maent van junio jnt iaer ons heeren dusent driehondert tvie ende tneghentich
</end>