Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1393_2

<begin>
Wij jacop vanden barghe ende jan allerts zoen scepene in aemstelredamme orconden ende kennen
</begin>
<main>
dat voir ons quamen willam ghisebrechts zoen ende lizebette dirc hannetgijns zoens dochter zijn wijf ende ghauen enen vrien eyghendoem mit ghezamender hant Der oerden vanden Canonissen gheleghen binnen der vrihede van aemstelredamme van den derdendeel vander huuzinghe ende erue gheleghen in die Kercstrate twisken claes die messemakers erue optie een zide ende meyster claes gherijt luutgijns zoens vrancken dirx zoens ende heynric vlamincs erue optie ander zide streckende vander haluer strate totter grafte toe Voirt zo ghauen zi enen vrien eyghendoem Der oerden voirscreuen vanden derdendeel vanden huuze gheleghen vpten middeldamme dair heyn noert nu ter tijt in woent twisken dirc morsiels erue optie een zide ende ghize gherijts zoens erue optie ander zide Ende voirt zo ghauen zi enen vrien eyghendoem der oerden voirnoemt vanden derdendeel vanden huuze ende erue gheleghen in gansoerde twisken groete Euerts erue optie een zide ende jan van der meeren erue optie ander zide In allen schijn ende pachte als zi alle deze voirscreuen huuzinghe ende eruen dair hebben Ende dit voirzeyde guet hebben zi der oerden voerseit ghegheuen voir zulke loefnisse als willam voirscreuen Der oerden voirseit jn Scepene brieue gheloeft hadde Ruerende van aliden zijnre dochter wes ziele god ghenadich zi
</main>
<end>
jn orconde dezen brieue bezeghelt mit onzen zeghelen ghegheuen vp sinte symons ende juden auont jnt jair ons heren duzent driehondert drie ende tneghentich
</end>