Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1393_3

<begin>
Wij Andries dueghede Jacop coppen zoen heynric van muden ende Jan die langhe Beraders van der Stede van aemstelredamme Doen cont allen luden
</begin>
<main>
dat wij ghegheuen hebben ende gheuen mit dezen opene brieue van der stede weghen voirseit Godeuert willems zoen enen vrien eyghendoem van enen erue anderhalue roede breet gheleghen vptie kerczide vptie landzide twisken bruninc croecs erue dat hi ghepacht heeft vptie een zide ende gherijt van wermers erue vptie ander zide after der stede erue dat verpacht is streckende die langhe van der stede erue voirseit Dat is te verstaen vp twie roeden na den westeren cant vanden huuze dat mit teghelen ghedect is ende dirc heermans zwagher dede tymmeren ende van dane voirt zestien voeten buten godeuert willems zoens poorthuuze vpt oesteynde ende an twesteynde raerechtuut te gaen ende dat oesteynde te gaen na den loep van der stede burchwalle an beyden tziden Ende die burchwalle zal zestien voeten wijt bliuen ende dien zal hi houden ende straten gheliken zinen bueren tot ewighen daghen
</main>
<end>
In orconde dezen brieue bezeghelt mit onzer Stede zeghel ghegheuen vp den zeuen ende twintichsten dach Jn december Jnt Jair ons heren Duzent driehondert drie ende Tneghentich
</end>