Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1410_1

<begin>
Wij Gherijt willems zoen ende Dirc heynrix zoen Scepene in aemstelredamme orconden ende kennen
</begin>
<main>
dat voir ons quam Willem noirt willems zoen ende gheliede dat hi gaf ende makede in die eere goeds ende in salichede zijnre zielen teenen rechten testamente dese nabescreuen guede jn allen scijn ende manieren als hier na bescreuen staet Te wetene es Eerst den Carthuseren tsinte andries ter saligher hauene tien guede goudene francrixe cronen Item den Canoniken Reguliers tsinte Johans ewangelisten ter aemstel tien guede goudene francrixe Cronen Item den Canonissen Reguliers tsinte marien velde tien guede goudene francrixe tronen Item den achten husen ende conuenten der zusteren van sinte franciscus oerde der penitentien te scriuen tien guede goudene francrixe Croenen Item den ghemenen priesteren in den coere tot eenre ewigher memorien voir katherinen sinen wiue voir Elisabetten sijnre dochter ende voir hem seluen Enen haluen Enghelssche nobele jairlixe tot ewigher renten te staen opter helfte vanden huse ende erue dat hi nu ter tijt bewoent ghelegen opten middeldamme tusschen Dirc janszoens erue an deene zide ende Claes peter clenerts zoens erue vp dander zide Item sinte peter gasthuus vijf guede goudene francrixe Croenen Item den groten gasthuze des heylighen gheests vijf guede [gou] dene francrixe cronen Item den armen huyssittende luden binnen der stede voirnoemt tien guede goudene francrixe Croenen Item den armen besiecten Luden van lazarien tsinte Joriaens bi der stede voirnoemt drie guede goudene francrixe croenen Ende den vijf biddende oerden te samen twee guede goudene francrixe croenen E[welike] dese voirseyde ende testamente te gaen ende te nemen alleens dat willem noirts guede voirnoemt [hier] [gheert] zijns wifs
</main>
<end>
In orconde desen brieue bezeghelt mit onsen zeghelen ghegeuen vpten dertienden dach in octobry Int iare ons heren Dusent vierhondert ende tien
</end>