Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1412_1

<begin>
Wij hildebrant braseman ende Jacob baernts zoen Scepene in Aemstelredamme oirconden ende kennen
</begin>
<main>
dat voir ons quam Aernt gode uaerts zoen ende gheliede dat hi vercoft heeft heren Jacob hermans zoen ende heren Roelof iacobs zoen priesteren ende executores van heren Jan moenen zoen priester zaliger gedachten alze tot behoef der gemeenre priesteren vanden chore in sinter nyclaes prochikerke tot eenre ewiger memorien van heren Jan moenen zoen voirseyt twalef vlaemsse grote ende een vierendeel van enen vlaemssen groten gelijc inden lande van vlaenderen gancaftich zijn Jairlixer renten ghelijc him angecomen is van wybrich aernts zijnre ouder moeder ende van huessche aernts zoen zinen oeme staende op der Oesterhusinge ende erue dair sinte peters capelle ende gasthuys die westerhusinge ende erue af toe behoert ende an gecomen is van katrinen ludeman ians zoens weduwe ende ludeman voirnoemt die eertijds deelde Jegens heyn gherijts zoen die doe gedeelt wart an dat oestereynde voirseyt dat nv willem bongenair toebehoert ghelegen in die hallestege Ende hi gheliede dair af vol ende al betaelt den lesten pennyne mitten eersten Voirt zo ghelouede aernt voirnoemt desen heren Jacob ende heren roelof tot behoef der gemeenre priesteren vanden core voirseyt dese voirseyde renten vri te waren alsmen vrye goede ende renten is scoudich te waren ende alle oude brieue af te nemen
</main>
<end>
In oirconde desen brieue bezeghelt mit onsen zeghelen Gegeuen vpten zeuen ende twintichsten dach in octobrj Int iare ons heren Duzent vierhondert ende twalef
</end>