Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1414_1

<begin>
Wij Jan berwouts zoen ende Jonge heyn noirt Scepene in aemstelredamme oirconden ende kennen
</begin>
<main>
dat wij wel ghesien hebben ende ouerghelesen enen brief ganse ende gaue onghecanseleert ende sonder enighe raizuyre wel bezeghelt mit scepene zeghelen van aemstelredamme Sprekende van woerde te woirde ghelijc hier na ghescreuen staet

Wy heynric van muden ende Ricout ians zoen Scepene In aemstelredamme orconden ende kennen dat voir ons quam ymme die Jan noerts wijf was mit willem noert heynrics zoen horen bestoruen mombaer ende mit meynaertden witten ende mit godeuaert ians zoen haren tween broeders ende gheliede mit horen mombaer ende broeders voirseyt dat si scoudich is Jan sanders zoen vijf vrancrijcsche oude scilde goet van goude ende zwaer van ghewichte Jairlixe renten staende toten eweliken pachte op die halue husinghe ende erue die si nu ter tijt legghende heeft an sinte annen strate op die zuutzide ende Claes heynen erue op die noertzide vander strate tot ander grafte te betalen dese voirseyde renten alle iare die een helfte te heylighemisse ende die ander helfte te meye Voert ghelouede ymme mit horen mombaer ende broeders voerseyt die oerseyde halue husinghe ende erue vry te waren ende alle oude brieue of te nemen vutghezet vijf oude vrancrijcsche scilde iaerlix die daer te voeren op stonden die zellen daer op staende bliuen In orconde desen brieue bezeghelt mit onsen zeghelen Ghegheuen des donresdaghes na sinte pouwels dach conuersio Int iaer ons heren 1300 een ende tneghentich

voirt zo quamen voir ons Claes byen zoen ende Griete sijn echte wijf die Jan sanders soens wijf was mit Claes voirnoemt har[en] [m]an ende mondbair ende ghelieden dat zij makeden in rechten testamente ende ouergauen ter eren goids ende in zal[ichede] van hoirre zielen die helfte van dese vijf vrancrijcsche oude scilde Jaerlixe renten voirscreuen Des zo zullen hebben die ghemeyne scheur priesteren vanden core der prochiekerken van sinter nyclaes binnen der stede voirseyt enen ouden vrancrixen scilt Jairlixe tot [ewi]ger memorie ende die memorie jairlixe te begaen ende te belichten mit drie wasse kairsen behoudeliken dat die prochiekerke desen ouden vrancrixen scilde Jairlixe zal hebben tien grote ende dair voir zal hi Claes ende grieten elix na hoirre doet so te gat [] den in ewiger memorien alle sonnendage voir te bidden opten stoel ende manendages memorie te begaen Voirt zo zullen die bewairres der armer huyssittende Luden inder voirseyder prochie hebben ter armer luden behoef jairlixe enen ouden vrancrixen scilt tot ewighen daghen ende dien alle iare te deylen opten goeden vrydach den armen Luden die dan omme ende in der voirseyder kerke bidden Ende tot den heylighen cruce mede te belichten dat staet voir den core in [de]r kerken voirnoemt dair zal toe gaen enen haluen ouden vrancrixen scilt vanden voirseyden pachte Jairlixe tot ewighen daghen In die eere goids ende tot salichede der zielen van claes ende grient sinen wiue voirnoemt ende van hoirre beyder ouders ende naisten liefsten vrienden
</main>
<end>
In oirconde desen brieue bezeghelt mit onsen zeghelen ghegeuen vpten neghentienden dach in decembrj Int iare ons heren Dusent vierhondert ende viertien
</end>