Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1424_1

<begin>
Wij Gherijt claes soen ende Jan deyman Scepene in Aemstelredamme oirconden ende kennen
</begin>
<main>
dat voir ons quamen jnt gherechte heren Claes godeuerts zoen priester mit Wouter Willems zoen sinen gecoren voeghet dair hi mit rechte aen quam mathijs roelofs soen jan die moelnair ians soen vroutgin jan die zalen wijf mit Jan jan heyntgin hannen soens soen horen ghecoren mondbair [dair] sij mit rechte aen quam Obrich jan die moelners dochter mit wouter voirnoemt horen mondbair dair zij mit rechte aen quam janerts zoen als een voeget van griete roelof claes soens dochter ende des conuents van sinte kathrinen wouter willems soen als een voghet van roecx roeloff claes soens dochter ende des conuents van sinte agnieten ende noch wouter voirnoemt als een voget van agniese roelof claes soens dochter ende des conuents van sinte cecilien binnen der vryhede van aemstelredamme ende ghelijeden alse erfnamen van obrich symon adams soens wijf was ende brechte Symon die zael jacobs soens wijf was hoirre dochter dat sij bi hoirs mondbairshanden voirnoemt bi guetdunken harer vier vierendelen ghelijc menze naist conde ghecrigen alse Jan jans soen herman hermans soen Jan die moelnair jan aelberts soen ende wouter voirnoemt ende bi consente der Rade vander stede voirseyt quijtscouden ende ouer gauen die ghemeen priesteren ende choirghesellen in sinter nyclaes prochykerke tot enen ewigen memorie anderhalue acker lands ghelegen bider sluze buten der kercstratepoirthuus Dair naist bi gheerft zijn jan die zael an die noirtside ende Otte gherstemans soen ende jan hermans soen vptie zuutside streckende vanden zeeburch tot an die waele toe In allen schijn alzet dair ghelegen is In deser manieren ende voirwairden dat die priesteren voirnoemd hier voir alle iare begaen zullen in der kerken voirseyt die memorie van obrich ende brechten hoirre dochter voirseyt als ghewoenlic ende custumelic is
</main>
<end>
In oirconde desen brieue beseghelt mit onsen seghelen ghegeuen vpten andren dach in decembrj Int jare ons heren dusent vier hondert vier ende twijntich
</end>