Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1425_1

<begin>
Wij Gherijt claes soen ende Jan deyman Scepene in aemstelredamme oirconden ende kennen
</begin>
<main>
dat voir ons quamen Dirc bairden zoen Jan symon nessen zoen ghijsebricht iacobs zoen ende dirc Jan godelofs soens zoen die kercmeysters waren van sinter nyclaes prochikerke in den jare voirleden doe men screeff in den iare ons heren dusent vierhondert vier ende twijntich ende ghelijeden dat zij alse kercmeysters vander zeluer kerken wegen bi consente der Rade vander stede voirseyt vercoft hebben heren johan moye alse een memorymeyster vanden ghemenen priesteren ende choir ghesellen van sinter nyclaes kerke binnen der stede van aemstelredamme voirs ende ghemenen priesteren ende choir ghesellen behoef voirs enen ha[luen] gouden ouden vrancrixen scilt jairlixer renten totten eweliken pachte staende vp een huus ende erue ghelegen in heyntgin hoecxstege twisschen jan symon nessen soens erue dat heyntgin hoec dair eertijts in pachte hadde an deen zide ende Willem smits erue was vpdander zide dat lourens peter bollen zoen eertijts ghepacht heeft Wilken haluen scilt jairlixer renten voirs godeuert jan diers zoen eertijts in rechten testamente besproken heeft sinter nyclaes kerke voirseyt in allen scijn die proper brieue dair of inhouden Voirt so ghelijeden die kercmeysteren voirnoemt dat sij noch van der kerken wegen bi consente der rade vander stede voirnoemt quijt scouden heren jan matotten gemenen priesteren behoef voirscreuen eenen quartiere van enen vrancrixen scilt jairlixe renten totten eweliken pachte vp een huus ende erue ghelegen in [peter] [jacobs] stege dat claes die linnen weuer in pachte houdt wilc quartier van den enen vrancrixen scilt jairlixer renten voirseyt eertijts peter jacobs zoen ende lu zijn wijf besproken hebben der ker[ken] [voir]seyt in allen scijn die proper brief dair af inhoudt die dese voirnoemde kercmeysters mitten andren voirseyden brief voirt opdroegen [quijt]scouden ende ouergauen den ghemenen priesters voirseyt Ende zij ghelijeder aff vol ende al betaelt den lesten penninc mitten eersten voirt so gheloueden dese kercm[eyste]rs voirnoemt vander kerken wegen bi consente der rade vander stede den zeluen heren jan moys priester totten ghemenen priesters behoef voirseyt dese dree quartiere van enen gouden ouden vrancrijxen scilt jairlixer renten voirseyt vry te waren jair ende dach alsmen vry pachte ende rente scoudich is te waren ende alle oude [brieue] af te nemen wilke voirseyde renten heren johan moys alse memorymeyster vanden ghemenen priesteren totter seluer priesteren behoeff ghecoft heeft [] ghecomen is van Willem verkenstekers memorie die hi den priesteren voirseyt besproken heeft dair men jairlixe zijn memorie voir doen sal als custumelic ende ghewoenliken is
</main>
<end>
In oirconde desen brieue beseghelt mit onsen seghelen ghegeuen vpten twee ende twintichsten dach in januario Int iare ons heren dusent vierhondert viue ende twijntich
</end>