Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1430_1

<begin>
Wij Jan van diemen ende Gherijt jan deymans soens soen Scepene in Aemstelredamme oirconden ende kennen
</begin>
<main>
dat voir ons quam gherijt baernts zoen ende scout quijt ende gaf ouer tenen vryen eyghene die ghemeene priesteren jn sinter nyclaes prochykerke tderdendeel van dree oude vrancrixe scilde goet van goude ende zwair van ghewichten jof payment also guet Jairlixer renten totten eweliken pachte staende vpten huse ende erue ghelegen anden burchwalle optie kercside tusschen wouter willems soens erue was an deen zide ende dirc gherijts zoens erue plach te wesen vptie ander zide Streckende vander stede oude grafte an den voirnoemden wouter willems soens erue toe wilc huus ende erue voirseyt peter symons soen eertijts ghehuert heeft jeghens geertruden aernt peters die salen soens weduwe totten eweliken pachte jairlixe om dree oude vrancrixe scilde voirseyt te betalen alle jare die voirscreuen huere die ene helfte tot heyligemisse ende dander helfte tot meye In allen scijn die proper brief dair af inhoudt dien gherijt baernst zoen voirn aen ghecomen is van gheertruudt sijnre moeyen voirseyt van welken voirseyden brief gherijt baernts soen tderdendeel vpdroech ende quijt scout den ghemenen priesteren voirseyt behoudelic dat die prochypape van sinter nyclaes kerke voirseyt sal hebben tvierendeel vanden enen vrancrixen scilt jairlixer renten voirseyt na wtwisinge der brieue als voirseyt staet In deser manieren ende voirwairden dat die prochypape ende die gemene priesteren voirseyt hier voir doen zullen alse voir deen helfte vanden enen vrancrixen scilt siaers voirseyt jan hugen ende wendelmoet zijns wijfs zaliger ghedachten memorien alle iare te doen op die octaue van onser vrouwen dach assumpcio ende zullen belichten mit dree cairsen Item so salmense optie predickstoel noemen ende jn die welke vierwerf te graue gaen als custumelic is Ende voir dander helfte vanden enen vrancrixen scilt tsiaers voirseyt So sal des ghelijcx die prochypaep ende priesteren voirseyt jairlixe memorie doen voir nelle hermans op sinte lucas auont ende belichten mit dree cairsen Item so salmen hoir noemen opten stoel voirseyt ende in die weke vierwerf te graue gaen als custumelic is Ende gherijt baernts zoen voirnoemt gheliede van tderdendeel vanden dree oude vrancrixe scilde jairlixer renten voirseyt vol ende al betaelt den lesten pennync mitten eersten voirt zo ghelouede gherijt voirnoemt desen enen ouden vrancrixen scilt jairlixer renten voirseyt vry te waren Jair ende dach als men vry pachte ende renten is scoudich te waren ende alle oude brieue af te nemen
</main>
<end>
In oirconde desen brieue beseghelt mit onsen seghelen ghegeuen vpten achte ende twintichsten dach in mairte Int jare ons heren dusent vier hondert ende dertich
</end>