Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1439_1

<begin>
Wij Jan deyman ende Claes auwels zoen Scepene In aemstelredamme oirconden ende kennen
</begin>
<main>
dat voir ons quam baernt assen zoen ende gheliede alsoe als sijn moeder margriete asse baernts zoens weduwe saligher ghedachten besproken ende ghemaket heuet den ghemenen priesteren vanden chore in sinter nyclaes prochiekerke enen haluen gueden goudene ouden vrancrixen scilt Jof payment also g[ue]t jairlixer renten tot ewigher memorien So makede baernt voirn den voirseyden priesteren dair toe noch enen haluen gueden goudene ouden vrancrixen scilt Jof payment alsoe guet Jairlixer renten tot ewigher memorien Ende dese voirseyde renten Iairlixe op te bueren vanden twien gueden goudene ouden vrancrixen scilden iof payment alsoe guet Iairlixer renten Die aelbert baernts soen eertijts mits enen scepene brieue vercoft heeft margrieten asse baernts soens weduwe voirs totten eweliken pachte staende vpten huse ende erue dat coeman meeus claes soen die tymmerman nv ter tijt bewoent ende in pachte heeft ghelegen in die kercstrate vptie noirt westhoic van sinte johans strate tusschen Willem cuper die wantsnyders erue andie noirtside ende sinte Johansstrate voirnoemt vptie zuytsijde Streckende vander haluer strate tot an alijdt gherijt deymans weduwe ende hoirre kinderen steynen camer ende erue toe In allen scijn alst van ouds aldair is ghelegen Dese voirseyde renten te betalen alle jare die eene helfte tot heylighemisse ende die ander helfte tot meye vryes ghelts ende sonder enigerhande afbreek Ende baernt assenzoen voirseyt ghelouede den ghemenen priesteren vanden chore voirn Desen enen ouden vrancrixen scilt Jairlixer renten voirseyt te vryen ende vry te waren Jare ende dach alsmen vrye pachte en de renten is scoudich te waren ende alle oude brieue af te nemen In deser manieren ende voirwairden dat die ghemene pri[estere]n voirseyt hier voir zullen begaen asse baernts zoens sijns vaders ende margrieten voirnoemt sijnre moeders memorie ende te belichten mit drien [wa]sse kairsen op sijnre moeders graf voirnoemt alle Jare op sinte matheus auondt ende sinte matheus dach Ende dan te lesen twintich zielmissen []nde voirnoemde [] [] baernt assen zoens doot voirnoemt sijn memorie alle Jare te begaen ende te belichten mit drien wasse kairsen duerende ten ewigen daghe
</main>
<end>
In oirconde desen brieue bezeghelt mit onzen zeghelen ghegeuen vpten twintichsten dach in Octobrj Int Jare ons heren Dusent vier hondert neghen ende dertich
</end>