Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1440_1

<begin>
Wij Jan eggairt peters zoen ende meester Jacob ruysschen zoen Scepene In aemstelredamme oirconden ende kennen
</begin>
<main>
dat [voir] [ons] quam Alijt claes Wedighen dochter mit fekerdey egberts zoen ende gheliede bij wille consente ende guetduncken van fekerdey voirn dat zij vercoft heeft quijtscout ende ouergaf den goids huys beraders van sinter nyclaes prochiekerke binnen der stede voirnoemt totter voirseyder kerken behoef ende den bewairres der armer huyssittenden luden binnen der stede ende inde prochie voirs totter seluer armer huyssittende luden behoef te samen tot enen vryen eyghene Een vierendeel vanden huyse ende erue dat fekerdey alberts zoen hair oeme saliger gedachten in sinen laitsten lijue bewoende ghelegen vptie kercsijde ander burchtwalletusschen der voirnoemder stede stege ende strate van ouds gheheten aernt claes zoens stege an die zuytzijde ende heynric die snyders huys ende erue dat hij nu ter tijt bewoent ende in pachte heeft op die noirtzijde Streckende vander voirnoemder stede oude grafte tot an aernt buelen zoens camere toe In allen schijn alst dair van ouds ghelegen is Welc vierendeel vanden huyse ende erue voirseyt bij besterften van fekerdey alberts zoen voirseyt gecomen was op sinen broeder Jan bout alberts zoen den poirtwachter vander carthuseren cloester Ende die carthuseren voirseyt der voirnoemder alijden hebben ouergegeuen mits enen scepene brieue Jn sulker maten dat sijs niet en soude vercoepen ten wair bij fekerdey egberts zoen voirseyt ghelikerwijs die proper brief voirseyt Dair af inhoudt Ende zij gheliede bij consente van der seluen fekerdey dair af al voldaen ende wel betaelt te wesen den lesten pennync mitten eersten Voirt zo ghelouede alijt voirnoemt bij consente van fekerdey egberts zoen voirseyt ende fekerdey voirnoemt ghelouede mit hair als een wairborge den goids huys beraders ende den bewairre der armer huyssittende luden voirseyt totter voirnoemder kercken ende armer huyssittende luden behoef tselue vierendeel vanden huyse ende erue voirscreuen te vryen ende vry te waren Jair ende dach alsmen erue ende eyghen is scoudich te waren ende alle oude brieue af te nemen
</main>
<end>
In oirconde desen brieue bezeghelt mit onsen zeghelenghegeuen vpten eersten dach in Julio Int Jare ons heren Dusent vierhondert ende viertichw
</end>