Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1441_1

<begin>
Wij Joest gherijts zoen ende Stenen melijs Scepene In aemstelredamme oirconden ende kennen
</begin>
<main>
dat voir ons quam herman Jans zoen ende scoutquijt ende gaf ouer ter eren goids ende tot salicheyt sijnre ouders ende sijnre vrienden zielen Den ghemenen priesteren vanden chore in sinter nyclaes prochiekerke binnen der stede voirnoemt ene ouerlantse rijnsche gulden iof payment alsoe guet jaerlixer renten totten eweliken pachte staende op een erue ghelegen in jonge roelofs steghe Dair naist gheerft sijn Jacob ians zoen an die oestzijde ende claes vander nyel vptie Westzijde Welke rijnsche gulden jaerlixer renten Jacob ians zoen voirseyt eertijts toe behoerde mits enen scepene brieue sprekende op dire heyn zwagers zoen Dien Jacob voirnoemt mits enen anderen scepene brieue heeft ouerghedraghen ende ouer ghegeuen herman ians zoen voirseyt in allen scijn ende ghelikerwijs die proper brieue voirnoemt dair af inhouden ende begripen Welke twee brieuen voirseyt Dat herman ians zoen voirnoemt Den ghemenen priesteren vanden voirseyden chore voirt opdroech quijtscout ende ouer gaf In deser manieren ende voirwairden Dat die voirseyde priesteren voir voirnoemde renten jairlix zullen begaen twee memorien ende die telken te belichten met drie wasse kairsen Te wetene die ene memorie ouer herman byen zoen ende ouer jan sinen zoen saligher ghedachten ende die ander memorie ouer gheertruyd Jacob lubberts zoens weduwe ende ouer margriete herman byen zoens weduwe hoirre zuster wez zielen god wese ghenadich Duerende tot ewighen daghen
</main>
<end>
In oirconde [desen] brieue bezeghelt mit onsen zeghelen ghegeuen op den een ende twintichsten dach in februario Int Jare ons heren Dusent vierhondert een ende viertich
</end>