Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1443_1

<begin>
Wij Jan allerts zoen ende Goessen dircx zoen Scepene Jn aemstelredamme oirconden ende kennen
</begin>
<main>
dat voir ons quam Gheertruud symon dappers dochter mit Willem ians zoen haren ghecoren mondbair dair zij mit rechte aen quam ende mit aernt iacobs zoen ende vrederie iacobs zoen haren vier vierendelen gelijc menze naist conde ghecrighen ende gheliede mit hairs mondbairs hant bij guetduncken hairre vier vierelen ende bij consent der Rade vander stede voirnoemt dat zij ghepacht heeft jeghens den memorimeester der ghemeenre priesteren van sinter nyclaes prochikercke vander seluer priesteren weghen Een helfte vanden huyse ende erue dat gheertruud voirseyt nu ter tijt bewoent gheleghen an den burchwalle noirtwairt van sinter nyclaes kercke voirseyt Dair naist bij gheerft zijn aernt iacobs zoen an die zuytzijde ende Claes ghijsberts zoen die compassemaker vptie noirtzijde streckende vander voirnoemder stede oude grafte tot an Oesscher willems zoens erue toe In allen schijn alzet aldair van ouds ghelegen is Totten eweliken pachte Jairlixe om anderhaluen guede goudene gwilhelmus hollantse scilde lest tdordrecht gheslegen iof payment dat alzoe guet is Dese voirnoemde pachte te betalen alle iare die een helfte tot meye ende die ander helfte tot heyiighemisse vryes ghelts ende sonder enich afbreck Ende mids dese voirseyde pachte zal die voirseyde helfte vanden huse ende erue voirscreuen vry wesen van allen anderen ouden brieuen pachte ende renten die dair op staen moghen
</main>
<end>
Jn oirconde desen brieue bezeghelt mit onsen zeghelen ghegeuen vpten vierden dach in Januario Int iare ons heren Dusent vier hondert drie ende viertich
</end>