Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1447_1

<begin>
Wij Claes Jans soen ende jan Aellerts zoen Scepene In Aemstelredamme oirconden ende kennen
</begin>
<main>
dat voir ons quamen Jacob peters soen van dordrecht dirc Jacobs zoen vander goude den ouden claes iacobs zoen van Aemstelredamme alse vogeden van willem vander graften drie dochteren horen ghetruweden wiuen die ouder Jan vander grafte Willems soen voir hem seluen ende voir peter hollant sijn broeder dair hij voir wairde ende loefde die jonger jan vander grafte ende gherijt vander grafte ghebroedere alse erfnamen van heyn hillen ende duue sinen wiue horen oudevader ende moeder saliger gedachten ende scouden samentlic quijt den memoriemeesters ende ghemenen priesteren in sinter nyclaes prochykerke tenen ewigen testamente van heyn [hillen] ende duue voirseyt Eerst een ende twintich grote enen ouden francrixen scilt voir viertich groet gerekent jairlixer renten totten eweliken pachte staende vpten huse ende erue ghelegen anden burchwalle vptie noirt side vander apostolen strate Ende enen francrixen croene voir dese tijt geslegen jairlixer renten totten eweliken pachte goet van goude ende zwair van ghewichte staende vpten noirderen hoecke van Jonge roelofs steghe In allen scijn die proper brieue dair aff inhouden dien heyn hillen ende duuen erfnamen voirseyt samentlic opdroegen quijt scouden ende ouergauen den memorie[eeste]rs ende ghemene priesteren mit enen opdracht van enen anderen conuents brieue ruerende vanden seluen croene siaers voirs beseghelt mits couents segele der carthuseren ter saligen hauene bider voirnoemder stede In deser manieren ende voirwairden dat die memorienm[eeste]rs ende gemene priesteren inder kerken voirseyt die nv sijn of namaels dair in hoir stede wesen sullen alle jare begaen ende die memorie doen sullen die gracien cairsen op te setten te belichten als dat behoirt alsmen heyn hillen duuen sijn wijf alijdt hoir dochter ende willem vander grafte die alijden voirseyt man was Jairlixe hoir wtuairt doen sal als dat ghebuert ende gewoenlic is
</main>
<end>
In oirconde desen brieue beseghelt mit onsen seghelen Ghegeuen opten achtienden dach in septembrj Int jare ons heren dusent vierhondert seuen ende viertich
</end>