Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1448_1

<begin>
Wij Jan symons soen van muden ende Gherijt die vroede Scepene in Aemstelredamme oirconden ende kennen
</begin>
<main>
dat voir ons quam jan eggairt peters zoen ende droech op scout quijt ende gaff ouer tenen vryen eygene den memorye meesters ende den ghemenen priesteren vanden chore in sinter nyclaes prochykerke binnen der stede van Aemstelredamme in der eeren goids ende tot salicheit sijnre ende lijsbeth sijns echten getruweden wijfs zielen ende oic hoirre beyder ouders zielen saliger ghedachten Enen scepene brief dair jan symons zoen jn belijet dat hij ghehuert heeft van jan eggairt voirseyt een erue ghelegen buten der kercstrate poirthuus an den zeedijc jairlixe om twee guede goudene gwilhelmus hollantse scilde Jn allen scijn die proper brief dair off inhoudt ende wtwijst Te wetene dat die priesters in sinter nyclaes kerke voirseyt alle iare na jan eggairts voirseyts doet op zijn sterffdach voir den enen scilt voirnoemt sijn memorie peter eggairt sijn vaders ende alijdt peter eggairts zijn moeders tot ewigen daghen doen sullen dat graff mit neghen wasskairsen te belichten Ende voir die ander scilt voirseyt zullen die priesters voirnoemt tot ewigen daghen doen vp lijsbeth jan eggairts sterffdach na hoirre doet hoir memorie Dire helmer hoirs vaders trude dire helmers hoir moeders ende garbrant helmer hoirs broeders memorie dat graf te belichten mit negen wascairsen Ende also lange als Jan eggairt ende lijsbeth sijn wijf voirnoemt in leuenden liue sijn sullen die priesteren voirnoemt die memorien doen voir hoir beyder ouders voirnoemt tot tween tiden van den Jare als Jan eggairt ende lijsbeth voirnoemt dat ghelieuen sal Ende hier mede zo ghelyede Jan eggairt voirscreuen vanden twee scilden siaers voirseyt voldaen te wesen den lesten pennync mitten eersten
</main>
<end>
In oirconde desen brieue beseghelt mit onzen seghelen gegeuen vpten vierden dach in septembrj Int Jare ons heren dusent vierhondert achte ende viertich
</end>