Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1450_1

<begin>
Wij heinric jan stuuers zoen ende baernt asse scepene in Amstelredamme oirconden ende kennen
</begin>
<main>
dat voir ons quamen claes Simon nessen zoen ende martijn Simon nessen zoen ende scouden quijt droghen vp ende gauen ouer die memorijmeesters ende gemeene priesteren in sinter nyclaes prochikerke binnen der voirnoemder stede twe guede goudene gwilhelmus hollantse scilde jairlixer renten totten eweliken pachte staende vp tvierendeel vanden huyse ende erue gelegen in die warmoesstrate dat gerijt wedige plach te bewonen alder naist ghijsbert van loenresloet heinrix zoen an die zuutzijde ende claes ians zoen vptie noirtzijde streckende vander haluer strate anden ye toe in allen scijn die proper pacht brief inhout Ende sij gelieden dair af voldaen te wesen den lesten pennync mitten eersten Voirt so geloueden claes ende martijn voirnoemt den voirseyden memorij meesters ende gemeene priesteren dese voirseyde pachte ende renten vry te waeren jair ende dach als men vry pachte ende renten is scoudich te waeren ende alle oude brieuen af te nemen
</main>
<end>
jn oirconde desen brieue besegelt mit onsen segelen gegeuen vpten twijntichsten dach in augusto jnt iare ons heren dusent vier- hondert ende vijftich
</end>