Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1454_1

<begin>
Wij coppert vechters zoen ende claes clements zoen scepene in Amstelredamme oirconden ende kennen
</begin>
<main>
dat voir ons quam claes peters zoen ende geliede dat hij gepacht heeft tegens heinric claes zoen die noirder helfte van een tuyne gelegen buten die nyewendijkerpoirte alder naist peter jans zoen mit die ander helfte van die tuyne an die zuuytzijde ende een sloet die den voirnoemden claes peters zoen half sal toebehoeren an die noirtzijde streckende vander stede grafte tot anden voirnoemden heinric claes zoens scuttinge toe in allen schijn alse dair gelegen is Totten eweliken pachte jairlixe om drie quartier van enen gueden goudene johannes beyersse guldene jof payment also goet Te betalen dese voirseyde pachte alle jare tot sinte peter advinala vryes gelts ende sonder enich afbrec Ende mids dese voirseyde pachte so sal die helfte van die tuyne voirseyt vry wesen van allen anderen ouden brieuen pachte ende renten die dair vp staen mogen
</main>
<end>
In oirconde desen brieue besegelt mit onsen segelen gegeuen vpten viertienden dach in junio Int jare ons heren dusent vierhondert vier ende vijftich
</end>