Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1454_3

<begin>
Wij coppert vechters soen ende rembout andries soen Scepene in aemstelredamme oirconden ende kennen
</begin>
<main>
dat voir ons quam peter coeman louwen zoen Ende scoutquijt tot enen vryen eyghene claes peter croecx zoen Enen gueden gouden philippus rijder jof payment dat alsoe guet is jairlixer renten totten eweliken pachte staende vpten erue gelegen jn peter jacobs zoens steghe dair lijsbet moeys andie westzijde ende peter vredericx soen vptie oestzijde naist bij gheerfft zijn gelikerwijs ende in allen scijn die proper pachtbrief dair gheertruyt hugh puysten weduwe mit claes hughen zoen horen zoen tvoirscreuen erue gepacht heeft om den gouden rijder siaers voirscreuen dair af inhoudt ende begrijpt dien peter voirscreuen den voirnoemden claes peter croecx zoen voirt vp droech quijtscout ende ouer gaf Ende hij gelieder af voldaen te wesen den lesten pennync mitten eersten voirt zo gelouede peter coeman louwen soen den voirnoemden claes peters soen dese voirscreuen pacht te vryen ende vry te wairen jair ende dach alsmen vry pacht ende eygene js scoudich te wairen ende alle oude brieue af te nemen
</begin>
<main>
in oirconde desen brieue bezegelt mit onzen zegelen gegeuen vpten neghenden dach jn octobrj jnt jare ons heren dusent vierhondert vier ende vijftich
</end>