Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1454_4

<begin>
Wij Amelijs andryes zoon ende Rembout andryes zoon Scepenen in Aemstelredamme oirconden ende kennen
</begin>
<main>
dat voir ons quam Reyner reyners zoon ende gelyede scoudich te wesen den gemene pryesteren in sinter nyclaes prochykerche enen guede goudene gwilhelmus hollantse scylt lest voir dese tijdt geslegen jof payment alsoe guet jairlixer Renten totten ewelijcken pachte staende vp die helfte vanden huse ende erue Dair hij nv ter tijdt inwoent gelegen an die kerckzijde vptie burchwalle Dair naist bij geerft zijn der stede stege geheten aernt ketelairs stege an die noirt zijde ende lou die slotemaker vptie zuut zijde streckende vander stede grafte tot an meeus symons zoons erue toe In allen schijn alst dair van ouds gelegen is ende nv ter tijdt betymmert staet Dese voirseyde Renten Te betalen alle jaere deen helfte tot sinte jans dage te mydde zomer ende dander helfte tot korssauront vrijes gelts ende sonder enygerhande afbreck Ende myds dese voirseyde Renten geloefde Reyner voirnoemt den seluen pryesteren die helfte vanden huse ende erue voirseyt te vrijen ende vrije te waeren van allen anderen bryeuen pachte ende Renten die dair vp staen mochten
</begin>
<main>
In oirconde desen bryeue besegelt myt onsen segelen gegeuen vpten sesthien- den dach in decembrij jnt jaere ons heren Dusent vyerhondert vyer ende vijftich
</end>