Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1455_1

<begin>
Wij willem bruyn ende lambert mylinc scepene in Amstelredamme oirconden ende kennen
</begin>
<main>
dat voir ons quam albert simons zoen ende scout quijt ter eeren goeds sijnre zielen ende sijnre ouder zielen salicheit die memorij meesters ende gemene priesteren in sinte nyclaes prochye enen haluen gueden goudene ouden engelschen edwairdus of rijcairdus nobele voir dese tijt geslegen jof payment also goet jairlixe renten wt enen brief van enen gueden gouden ouden engelschen edwairdus of rijcairdus nobele voir dese tijt geslegen jof payment also pet jairlixe renten totten eweliken pachte staende vp een huys ende erue gelegen in sinte geertruyden strate tusschen godeuairt willems zoens erue an deen zijde ende ruusche albert diers zoens erue vptie ander zijde streckende vander haluer strate tot an adam die sale jans zoens erue welc huys ende erue albert peter bacx soen eertijts gehuert heeft tegens simon alberts zoen om enen engelsche nobel voirseyt jn allen schijn die proper pachtbrief inhout Ende hij gelieder af voldaen te wesene als vanden haluen nobel siairs voirseyt den lesten pennync mitten eersten jn deser manieren ende vorwairden dat die memorij-meesters ende gemene priesteren voirnoemt hier voir jairlixe twe ewige memorijen doen sullen den enen voir simon alberts zoen saliger gedachten sinen vader vp sinte thomas Auont ende sinte thomas dach mit drie caersen te belichten ende den anderen voir sijn moder ende suster als nelle simon alberts zoens weduwe ende kerstijn hair beider dochter vp sinte geertruyden Auont ende sinte geertruyden dach oie mit drie caersen te belichten Te betalen dese voirscreuen renten alle jaere die een helfte tot heiligemisse ende die ander helfte tot meye vryes gelts ende sonder enich afbrec ende die priesteren voirnoemt sullen hair halue nobel alleen bueren tot heilige misse
</begin>
<main>
jn oirconde desen brieue besegelt mit onsen segelen gegeuen vpten twaleften dach in februario jnt jaere ons heren dusent vierhondert vijf ende vijftich
</end>