Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1455_2

<begin>
Wij heinric dircx zoen ende lambert mylinc scepene in Amstelredamme oirconden ende kennen
</begin>
<main>
dat voir ons quam dirc peters zoen ende geliede dat hij gepacht heeft tegens willem claes jacob copperts zoens zoen een huys ende erue gelegen vptie zeedijck dair naist bij geerft sijn gerijt die groet an die noirtzijde ende louwerens jacobs zoen an die zuutzijde streckende vander haluer strate ander stede vesten toe jn allen schijn alst dair gelegen is Totten eweliken pachte jairlixe om twe guede goudene gwilhelmus hollantse scilde lest tdordrecht geslegen jof payment also goet Te betalen dese voirseyde pachte alle jaere tot meye vryes gelts ende sonder enich afbrec Ende mids dese voirseyde pachte so sal tvoirseyde huys ende erue vry wesen van allen anderen ouden brieuen pachte ende renten die dair vp staen mogen behoudelic dat dirc peters zoen voirnoemt dese voirseyde pachte ende renten binnen tien jaeren eerstcomende afcopen ende lossen mach so wanneert him gelieuet heel half of tvierendeel alse voir elken enen pennync jairlixe renten voirseyt twijntich der seluer pennyngen te geuen ende daren bouen die verschenen renten na beloep des tijts
</begin>
<main>
In oirconde desen brieue besegelt mit onsen segelen gegeuen vpten viertienden dach in februario jnt jaere ons heren dusent vierhondert vijf ende vijftich
</end>