Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1456_1

<begin>
Wij simon jacobs zoen ende peter allert scepene in Amstelredamme oirconden ende kennen
</begin>
<main>
dat voir ons quam jacob gerijts zoen ende geliede sculdich te wesene die memorij meesters ende gemene priesteren in sinte nyclaes prochye enen gueden goudene gwilhelmus hollantse scilde lest geslegen jairlixe renten totten eweliken pachte staende vpten vryen erue dat jacob hamelbuyck in pachte plach te hebben gelegen vpten burchwalle bij peter jacobs zoens brugge dair naist bij geerft sijn egbert die metselair an die noirtzijde ende claes reyer meyntses zoen an die zuutzijde jn allen schijn alst dair gelegen is Te betalen dese voirseyde renten alle jare tot heyligemisse vryes gelts ende sonder enich afbrec behoudelic dat die memorij meesters ende gemene priesteren voirnoemt hier voir jairlixe een ewige memorij doen sullen voir gerijt claes coppen zoens sijn vader ende hillegont sijn moder saliger gedachten te samen vpten anderden ende derden dach in januario mit drie caersen te belichten Ende als jacob voirnoemt oflijuich geworden sal wesen so sullen die memorij meesters ende gemene priesteren voirnoemt jairlixe een ewige memorij doen voir jacob voirseyt vpten seluen dach voirseyt behoudelic dat jacob voirnoemt die helfte van dese gwilhelmus scilde jairlixer renten voirnoemt sijn leuen lange vpbueren ende ontfangen sal ende niet langer
</begin>
<main>
Jn oirconde desen brieue besegelt mit onsen segelen gegeuen vpten achte ende twijntichsten dach in decembrij Int jare ons heren dusent vierhondert sess ende vijftich
</end>