Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1482_1

<begin>
CCCXXVI Opten XIIsten dach in Aprill anno etc LXXXII ende ter selver tijdt als men sprack van den hondersten penning te gaderen ende die mueren toirnen ende poirten van der stede te maken was gewilkuert gesloten ende overdragen by den schout tgemeyne gerechte ende die heele vrootscap ende rijcdoom van der voirscreven stede
</begin>
<main>
dat van doe voirtan gheen cloosteren noch geestelicke husen hoe die genoomt zijn off wesen moghen gheen husingen ofte erven bijnnen deser stede ende vryheit van dien gelegen en sullen moghen vercrygen tsy by cope by ghifte by besterfnisse ofte anders hoe dattet sy ende tot hoeren cloosters behoeff annemen ende annexe van dien maken noch oick dat niemandt den voirscreven cloosteren en moet husingen ende erven vercopen up te verbueren die vercopers die husingen ende erven die sy den cloosteren vercoften halff tot mijns sheren behoeff ende halff totter stede behoeff ende die cloosteren die de erven coften alzoeveel gelts als die husingen ende erven wairdich waeren ende dairtoe verbuert te hebben die vryheit die zy hebben van der excijss van hoeren bijnnen gebrouwen byer alsdat sy die excijss dairoff betalen voirt souden moeten als zy van de vreemde byeren gewoentlick zijn van doen Dit was oick omtrent anderha[l]ff jair hier te voeren by den gerechte rijcdoom ende heele gemeente oick gesloten ende overgedragen hoewell by versumenisse dat ongescreven gebleven was Dairomme dit weder vernuywet ende bevolen was te boecke te stellen Des souden die voirscreven cloosteren behouden die erven die zy gecoft ende an horen cloosteren annexe gemaect hebben voir der tijdt dat tgeent dat voirscreven is eerstwerff gewilkuert gesloten ende overgedragen is geweest
CCCXXVII Item dat die guede luyden van den gerechte waerschuwen een ygelijck also Simon Modder dagelix overmids der coopmanscap die hy hantierende is voir rechte onbehoirlijcke manyeren houdt ende denghenen die rechtelick tegen hem tugen dreycht te slane ende slaet nyemant daeromme enyge coopmanscap mitten voirscreven Simon doen sall want men daeromme in toecomende tyden gheen recht doen en sall ende dat Simon voirscreven hieromme nyemant misdoen en sall mit woirden noch mit wercken up die verbuernisse boven tsheren boeten van XXVM steens off XXV Postelaetsgull daervoir Ende hier en sal anders gheen bedrach off wesen dan tgerechts proeven
CCCXXVIII Item die burgermeysters scepenen ende raide wilkoeren ende gebieden dat nyemant enyge bussen schieten en sal buyten consent van zijn capeteyn up alsulke correxye als tgerecht daeroff doen sall
CCCXXIX Scout burgermeysters scepenen ende raide wilcoeren ende gebieden dat nyemant hy zy wijff off man jong off oudt upten vesten comen en moet after dat die clock X geslagen zall hebben dan allen diegheen diet zijn waeck is up die boot van III lb te verbueren alsoe dick als yemandt dairup becoort wart
CCCXXX 1. Soe wie dat die VIII personen van den hondersten pennijnck ontbieden upter stede huys by hem te comen die dan niet en comt als hem die weet gedaen is die sal inleggen alle dage up III lb
2. Dat nyemandt uuter stede vaeren en moet die zijn honderste pennijnck niet betaelt en heeft uptie boot van III lb alle dage die hy uut is te verbueren
CCCXXXI Dat tot allen tyden als die clock geslagen sall worden soe sall een ygelijck mit sijn harnasch ende were comen up sijn homanscap op die vesten ende zullen aldair blyven ter tijdt toe dattet gerecht omme die vesten gegaen ende hemluden oirloff geven sullen thuys te gaen up die verbuernisse van lijff ende guedt dies niet en dede
CCCXXXII Alsoe die burgermeysteren gewairschuyt sijn alsoewell uter stadt van Utrecht als van anderen plaetzen dat diesulve van Utrecht grote vergaderinge maken omme een spronge up deser stede te doen tsy by dage off by nachte wilkoeren dairumme die scout burgermeysters scepenen ende rade dat alle dieghene diett hoir buert is om te waken off die poirte by dage te bewaeren dat die mit hoere harnasch te weten mit een panser off mit een creeft ende mit hoere hooftharnasch up die wake comen ende waken sullen na inhoudt der wilkuere die dairoff is up een boet van VI st te verbueren die mit hoere harnasch als voirscreven is die scutters mit hoere boghen ofte clovers mit hoere toebehoeren up die wake off up die wachte niet en quamen ende dat sullen die wakers selve hebben ende verdrincken mogen
CCCXXXIII 1. Item dat alle dieghene die boven twichtich jaeren ende beneden LX jaeren oudt sijn selve in persone te wake comen sullen zonder een ander in hoere stede te stellen then waere dat yemandt syeck off van huys waere die sullen by believen van hoere hooftman ende anders niet een ander in hoere stede setten mogen up die boete van XII stuvers ende dat gelt zullen hebben die wakers van der hooftmanscap dairt in gebuert
2. Item dat nyemandt uuyt sijn homanscap en sall gaen drincken up die boet van VI stuvers mede tot behoeff van den wakers
CCCXXXIV 1. Dat nyemandt die vader moeder broeder suster neeff nicht verliest off enyge vrunden die gesturven is enyge gasten bidden en zal ten eeten tzy in herbergen in hoere selvenes huysen off in andere huysen up een boet van X lb ende dat nyemandt ten doode voirscreven en sall gaen eethen up een boet van I lb elc mensch te verbueren
2. Dat nyemandt gheen kinderman by nachte anspreken en sall up een boet van een lb te verbueren alzoewel die dat kindt toebehoirt als dieghene die de kinderman anspreken
CCCXXXV Scout burgermeisters scepenen ende rade der stede waerschuwen enen ygelijck dat nyemandt Jacob Ghijsbertszoon genoempt die Cat yet leenen borgen off enyge comanscap mit hem doen en sall want men dairoff in toecomende tyden gheen recht doen en sall want hy der stede kint gemaect is Ende dit is by der stede clock van den huus geroepen den VIen dach in Julio anno LXXXII
CCCXXXVI Dat alle dieghene die van den VIII personen van den honderste penning te gaeren ontboden worden te comen ende hoere penningen te betalen dat die terstondt comen ende betalen sullen ende sullen moghen ofcorten tgeendt dat zy geleent hebben ende oick die renten die hem upter stede verschenen sijn voir Meye ende anders niet of sy sullen inleggen zoe lang dat sy betaelt hebben ende dairtoe sullen sy verbueren alle dage III lb ende indien sy niet inne en laghen zoe sullen sy alle dage verbueren X lb totter stede behoeff
CCCXXXVII 1. In den eersten dat alle die zeescepen die buten der palijngen int Ye leggen dat sy hoir anckeren luchten zullen ende gaen leggen van der stede ter halver Ye off an die Oostzyde of an die Westzyde van der stede gaen leggen van der stede alsoe verde als ter halver Ye verde ende dat sy dat doen van desen dage by der sonneschijn want die guede luden van den gerechte willen hebben datter geen scepen voirscreven leggen sullen int Ye voir der stede als voirscreven is uptie verbuernijsse van II lb alle dage te verbueren
2. Item dat alle diegheen die van Hoirn hier in der stede sijn dat sy van desen dage upter stede huus comen ende hoere namen laten scryven by der stede clerck off dat sy van desen dage by der sonneschijn uuter stede gaen sullen ende dair niet weder incomen upte verbuernijsse van XX lb alle dage te verbueren
3. Item dat alle die ruyteren ende knechten die hier in der stede sijn dat sy van desen dage by der sonneschijn uuter stede gaen ende reysen onder hoeren capiteyn dair sy onder dienen ende wair datter enijch waeren die wat te copen hadden die sullen comen by den scout ofte burgermeysteren ende die sullen hier soe lange mogen wesen als die scout ofte die burgermeysters hem consenteren ende niet langer upte verbeuren van III lb alle dage
4. Ende dat alle die Oude scutters alle die Jonge scutters ende alle die Handboge scutters voirtan terstont ende alle dage gaen sullen mijt een panser ofte mijt een creeft ende mijt een lang mess up hoeren zyde uptie verbuernijsse van sess stuvers alle dage te verbueren die dair niet mede en ginge Ende dese boeten sullen gaen te weten elke scutterye tot hoeren outair Ende dese boeten sullen die overmans elk in hoeren gilde terstont halen uut hoeren huysen Ende indien dat die overmans dese boeten niet en haelden soe sall die scout dieselve boeten halen ende nemen van den overmans in allen schijn of sy se verbuert hadden
CCCXXXVIII Dat alle dieghene die hoere schepelen halfschepelen maten ende oick mede die strekelmaet niet doen ijcken en hebben dat zy dieselve maten ende oick die strekelen brengen zullen in Onser Vrouwencappelle bijnnen deser tijdt ende margenavondt ende doen die ijcken op die boet van I lb halff die heere ende halff die ijckers
CCCXXXIX Item dat dieghene die tloedt toehoirt dat up die Plaetze leyt of diet in hoere bewairinge hebben dat zy dat van der Plaetze doen brengen zullen ende leggent voir hoere doiren of op hoere erven tusschen dit ende morgenavondt op een boet van III lb te verbueren
CCCXL Item dat die backers een roggenbroodt niet hoger geven en zullen dan om III stuvers ende I oirt ende dat die backers des niet te mijn backen noch vercopen en zulle kuere 1 als die oude wilkuere dairof inhoudt Ende dit en sal niet langer staen dan tot een Maendage naestcomende
CCCXLI Item dat dieghene die melk vercopen dairtoe zyen die luyden hoere volle maet geven ende hoere maten zoegroot houden als die oude wilkuere dairof inhoudt up alsulke correxye als tgerecht dairof doen zal
CCCXLII Item dat nyemandt riet noch grass meyen noch halen en moet van den Heyligen Wech dan by consent van den Heyliger Stedemeysters op een boet van III lb te verbueren
CCCXLIII Alzoe by den gerechte zekere hondecreeften geordineert sijn omme den honden doet te slane zoe wilkoeren ende gebieden die scout etc dat nyemandt die hondecreeften dairomme misdoen en sullen mit woirden noch mit wercken op alzulke correxye als tgerecht dairof doen sal enen anderen ten exempele Ende hier en sal anders gheen bedrach of wesen dan sgerechts ondervijndinge
CCCXLIV 1. Dat nyemandt van den ingesetenen van deser stede uuter stede vaeren en zullen al wairt oick dat sy consent van den burgermeysteren hadden op die verbuernisse van hoere lijff ende guedt
2. Item dat een ygelick sijn harnasch ende tuych gereedt maken sal van desen dage want als sy morgen geboden worden uut te vaeren dat sy dan niet seggen en mogen dat sy niet reedt en sijn of dat men hemluyden niet te voeren geseyt en heeft
3. Item alle die scippers van den Rijnscepen alzoewel onse poirters als die vreemde van waer dat sy sijn die van den knechten van deser stede toegesproken worden omme tot Muyden te vaeren ende aldair in te nemen heren Salyairts volk ende die te voeren tot Spaerendamme dat sy terstondt tseilgaen ende derwairts vaeren sullen sonder enige vertuevinge ende doen als voirscreven staet op die verbuernisse van hoere scepen ende dairtoe een jair lang uuter stede gebannen wesen op hoere rechterhandt want die burgermeysters sullen hem wel loenen
CCCXLV Upten IIIen dach in Septembri worde mitter stede clock ofgeropen dat alle dieghene die hoere honderste penninck niet betailt en hebben dat sy tusschen dit ende een Vrydach naestcomende betalen of die scout mitten gerechte sullen pandt uut hoeren huus halen tot zoeveel als die penningen bedragen ende dat voirt terstondt voir stedehuus te vercopen
CCCXLVI 1. Dat alle dieghene van den scutteren ende van den gemeenten die geboden zijn uut te vaeren ten heervairt tegen den vianden dat sy morgen tot VIII uren mit hoere harnasch ende weer op die Plaetze comen zullen als die stedeclock geluyt is ende zullen terstondt van daen tscheep gaen ende die bannyer volgen op lijf ende guedtte verbueren
2. Dat die vrunden ende magen van den Oude scutteren diet hoere reyse is uut te vaeren ende die van huys zijn sullen van stonden an ouer dach ende nacht sonder tueven die thuys ontbieden te comen omme voirt uuth te reysen ende die bannyer te volgen up die verbuernijsse van hoere lijff ende guedt
CCCXLVII Upten IXen dach in Septembri is by die clocke ofgeropen dat nyemandt hy sy poirter of gast enygerhande fytalie ofte etelwair uuyter stede voeren en sal mogen tot wat plaetzen dattet sy uutgeseyt int heer van dese landen leggende nu ter tijdt int velt ofte opten fronteren van dese landen op die verbuernisse van die fytalie ende voirt tot sgerechts proven
CCCXLVIII Dat alle dieghene die hoere honderste penning niet betailt en hebben dat die mit hoere penningen boven by die VIII persoenen comen ende betalen zullen gelijck andere gedaen hebben tusschen dit ende een Woensdage naestcomende off sy zullen in hoere huysen blyven sonder dairuut te gaen ende sullen dairtoe verbueren alle dage XM steens totter tijdt toe dat sy betailt hebben ende dieghene die uutgingen ende niet in hoere huus en blyven leggen als voirscreven is die zullen verbueren XXM steens Een ygelijck wacht sijn schade want men sal mit die wagen ommegaen ende halen die panden alzoewel voir die boeten als voir tprincipael gelt ende men sal die panden terstondt vercopen ende penningen
CCCXLIX Item die guede luyden van den gerechte mitten XXXVI hebben geordineert dat Albert Kantert Peter Mijn Gerijt Claeszoen ende Blanck Jan ontfangen zullen die penningen van denghenen die hoere erven te verde uutgesteken hebben dat geroeyt is ende wilkoeren dairop dat alle dieghene die by den voirscreven IIII personen opter stede huus ontboden warden omme hoere penningen van den roeynge te betalen dat zy terstondt comen sullen ende betalen op een boet van IM steens te verbueren soe dick als zy dairoff in gebreke waeren
CCCL Dat een ygelijck diet sijn boirte is te waken op die wake gaen sall savonds alzmen die clock luyt ende sal voirt aldair blyven tot smorgens dat die clock VII slaet als men die clock luyt op alzulke boeten als dairtoe staen
2. Item dieghene die over LX jaeren oudt sijn ende dieghene die zieck sijn die zullen mogen betalen mit een man in hoere stede te setten dair die capteyn van der waeck an genoecht ende niemandt anders
3. Item een ygelijck zie wel toe hiervan in gebreke te wesen want men en sal niemant die boeten verdragen ende men sal die walle omme gaen scouwen
CCCLI Item alle die ruytereknechten die niet in soudye onthouden en sijn die zullen by sonneschijn van dese dage uuter stede gaen op een boet van II lb thensy by oirlove van den scout ofte burgermeysteren
CCCLII Item want die guede luden van den gerechte te kennen gegeven is van den vrienden ende magen van Martijn Jacobszoen alsdat hy niet bequaem en is sijn selfs goede te regeren begherende ende versoekende dairomme an hemluden dat sy den voirscreven Martijn tontvoechden ende hem in der voechdye van der voirnoemde stede nemen wouden navolgende trecht ende wilkoere van der stede die dairoff sijn twelk die scout mitten gerechte gedaen ende mit vonnisse oick besteedt ende gevesticht hebben ende laten dairomme enen ygelijck weten dat niemant tegens hem copen noch vercopen ende noch lenen noch borgen en zal want men in toecomende tyden dairoft gheen rechte doen en sall
</main>
<end>
</end>