Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1511_1

<begin>
</begin>
<main>
CCCCXXXV
1. In den eersten en zal men gheen vissch afslaen daer men an twyfelt oft die bequaem is om teten tenzy dat die eerst besien ende gevisiteert is by den vinders op de boeten van een lb Hollants die gelden ende betalen zall doffslager
2. Item dat men alle de vissch leggende in bennen ende hier vercoft werdt gehouden zall wesen te leveren onder als boven oft de cope en zall van gheenre waerde wesen ende dit tot discretie van den vinders
3. Item alle de vissche die binnen deser stede gebrocht werdt sal men ofslaen opt naeste maell als die hier gecomen zall wesen ende zoe wye geloot heeft omme zijn vissch te laten afslaen die en zall deselve vissch nyet weder mogen mynen omme die op een ander maell te vercopen oft weder uuyt der stede te voeren op de boete van elcke benne een scelling Hollants Maer indien yemandt compt mit vissch binnen deser stede omme dezelve vissche tot een ander stede te brengen ende die hier tegens zijn wille gehouden ende ofgeslagen werdt die zall deselve vissche weder mogen mynen indien hem die nyet genouch gelden en mach ende daernaede reysen daert hem gelyeven zall mar als hy die alzoe gemijnt heeft en zall deselve vissche binnen deser stede op een ander maell nyet weder afgeslagen mogen werdden op de boete van elcke benne te verbeuren II scelling Hollants daeraff de visschvercopere gelden zall deen helft ende dofslager dander helft
4. Item dat dofslaser die nu ter tijt is oft namaels comen mach gehouden zal wesen van Sinte Geertrudendach off tot Sinte Lambertsdach toe te ghaen in de ringhe omme de vissche of te slaen des morgens te sevendalven ende des avont ter vier uren ende van Sinte Lambertsdach tot Sinte Geertruydendach des morgens tachtendalven ende des avonts ter drie uren op de boete van een lb Hollants
5. Item dat een ygelijck wye hy zy die des morgens ennige vissche gemijnt heeft gehouden zall wesen dezelve vissch te vollen te betalen sonder ennige resten schuldich te blyven voort avontmaell van denzelven dach op de verbeurte van gheen ander vissch te mogen mynen eer dezelve vissch die des morgens gemijnt is betaelt zall wesen Ende wye int avontmaell ennich vissch mijnt zall oick gehouden wesen die te betalen des anderen daechs voor den middach oick op de verbeurte van gheen vissch meer te mogen mynen eer de vissch die gemijnt is betaelt zall wesen als voirscreven staet Ende in desen en zall dofslager mit nyemandt dissimuleren op de boete van een lb Hollants die dofslager selve betalen zall
6. Item dat de visscopers des morgens de nebbelinck oft andere aell anders nyet en zullen mogen ontfangen dan by vierendeelen ende possch baerdssen ende andere vissch zal men gehouden wesen tontfangen by manden ende nyet by zooden oft tobbens ende nyet anders dan in den offslach op de boete van een lb Hollants die gelden zall de voorcoper ende copere halff ende halff Ende zoe wye vissche ontfanct by vierendeelen oft manden die zall gehouden wesen tloon van den ofslagere in te houden Ende nyemandt en zall by andere manden mogen meten dan die Sinte Petersghild toebehoeren
7. Item indien ennige visscopers oft vleysschouders yet verbeuren tegens den vinders angaende deser ordinancie die zullen gehouden wesen heuren verbeurde boeten te betalen eer zy ennich vleyssch oft vissch weder zullen mogen vercopen op de correctie van der stede
8. Voort ordonneren ende maken mynen heeren van den gerechte den vinders die nu zijn oft naemaels zullen mogen comen executeurs van de boeten die boeten die uuyt crachte van deser ordinancie verschynen zullen daer zy alle vierendeell jaers rekeninge off doen zullen tappliceren een derdendeell tot behouff van den heere een derdendeell tot behouff van der stede een derdendeell tot behouff van den vinders
CCCCXXXVI Voort wye zijn eedullen van der wake nyet boven gebrocht en heeft dat hy die brenge tusschen dit ende en Donresdach naestcomende dien dach all op de boete van elck hooftman te verbeuren een lb Hollants
CCCCXXXVII Vernieuwing van CCCCVI 1 en 2
CCCCXXXVIII Mijn heeren van den gerechte doen te weten dat alle deghene die op Schelpen ofte opten Stichsen bodem beschadicht zijn dat zy binnen achte dagen comen opter scryfcamere ende anbrengen by hoeren eeden wat scade zy geleden hebben ende hem gedaen is zeedert den tijt dat de paeys van Utrecht hiervercundicht worde
CCCCXXXIX Gebieden voert dat men gheen ossen ofte koeyen die te schepe binnen deser stede commen sal moghen dryven uuyt ennighen poerten deser stede langes den dijck uuytgeseit die beesten die men in de weyde brenct
CCCCXL
1. Insgelijcx bevelen mijn heeren van den gerechte dat alle dieghene die boven XVIII jaeren ende beneden LX jaeren out zijn tzy zy sijn poerters oft inwoeners oft in verscheyden huysen oft in een huys tesamen woenen dan nyet dat die waken sullen mit hoeren capiteynen daer zy onder staen opte correctie daertoe staende Ende voerts dat alle die mannen die boven LX jaeren out zijn ende hoer goet IIIIe gulden waerdich is schuldich zijn een man in hoeren stede te stellen omme te waken
2. Item dat alle de weduwen ofte maechden die selff huysraet houden wiens goet IIIIe gewaert is oick een man sullen stellen in hoeren stede
CCCCXLI Insgelijckx bevelen mijn heeren van den gerechte dat alle dieghene die varckens slaen dat die by mijn heeren die burgermeesteren commen sullen ende doen hoer eedt eer zy ennighe varcken slaen opte correctie van der stede
CCCCXLII
1. In den eersten dat van nu voertan alle der stede boeden zullen gehouden wesen alle werckedaghen alsoe dick als die burgermeesteren vergaderen boven zullen wesen voere neghenen op die verbeurenisse van een stuver ten waere dat hy bewysen konde by den scout oft by ennigen van den burgermeesteren uuytgesonden geweest te hebben
2. Item voert dat nyemant van den dienaers dan van den cameren en zal gaen voere dat mynen heeren van den gherechte van der stede huys gaen ten waere sake dat hy van mynen heeren van den gherechte om een bootscap gesonden worde oft van pertien op die verbeurenisse van een stuver
3. Item waert dat van nu voertan eenich van den dienaers van den anderen beloepen wordde sittende drincken in een herberghe des morghens after neghen uren als die burgermeesteren oft mynen heeren van den gherechte vergadert zijn die waers op een stuver ende oft nu die boede die den anderen bevonden hadde dat nyet uuyt en brochte ende dan van eenen anderen boede beloepen worde dat hy by den eersten boede geseten hadde ende zy dat mit hen tween soe versmoerden die warens elck op een doubbelde stuver
4. Item dat van nu voertan soe wat ghelt die boeden verdienen mitten garden soe dick als die heeren vergadert zijn hetzy des morghens oft des achternoons dat sullen zy in den bosse brenghen op die verbeurenisse van een gouden gulden Dit zal staen tot proefve van den burgermeesteren
5. Item soe watt boede mitten brootwegers des morgens omgaet ende watt hy daeraff crijcht van gheltswegen dat zal hy gehouden wesen in den bosse te brenghen
6. Item datter alle avont een van den boeden zal gehouden wesen ende die dienaere die int stehuys woent te comen int Vrouwenloff an die zyde ende in der kercken daer de burgemeester woent diet zijn vierendeel jaers is op die verbeurenisse van een stuver ten waere sake dat dieghene diet zijn beurtte waere behoirlijcke excusatie hadde
7. Item die boeden zullen stellen by ordinantie van den outsten eerst ende dat elck van hen een vierendeel jaers procurator van hem zijn zal die gehouden zal wesen alle die vallende boetten te executeren by eede ende op peyne dat hy wetende versuympde van een schelling elcke reyse ende dit all in den bosse te brenghen
8. Item indien de procurator in der tijt van huys oft sieck waere soe zoude zijn stede vervullen dieghene diet tvoirleden vierendeel jaers procurator geweest zal hebben ende soe voertan
9. Item dat men doeverloep van den bossen boven de oirtgens van den reysende boeden die daer uuytgaen zullen delen zal vierwarfven des jaers als Purificationis May Petri ende Omnium Sanctorum
CCCCXLIII
1. Alzoe die capiteynen van ennighe houfslaghen hem beclaecht hebben van quaet geryve van turf ende keerzen die men hem tot noch toe gedaen heeft soe ordineren mynen heeren van den gerechte dat alle die capiteynen van den houfslagen oft in hoer absentie hoeren stedehouderen self turf ende keerzen besorgen sullen Des soe sullen mijn heeren die burgermeesteren uuyten name van den cloesteren elck capiteyn voer zijn turf des nachts doen hebben by een van hoeren dienaeren III groet Vlaems
2. Ordineren voert dat die capiteynen gehouden sullen wesen als zy te wake commen voer hoer mede te nemen een lanttaern opten houfslach omme die te bezigen indient van node waere
CCCCXLIV Al eest soe God betert dat in den zoemer lestleden vele scepen tot groot achterdele deser landen by den Lubecxen ende heuren adherenten genomen ende beroeft zijn geweest ende dat mitsdien een yegelijch wel behoerde ende oick van noode is hem nyet te stellen in pericule van gelijcken te gebeuren soe verstaen mynen heeren van den gherechte nochtans dat ennige zijn die heure scipheeren souden willen seynden nae Danzijck omme ennige scepen daer leggende te halen sonder ordinancie oft ennige beschermenisse daerby te wesen stellende alsoe hemselven in pericule van genomen te werdden daerby desen landen gescapen waere een onverwinlijck quaet oever te coomen dat mynen heeren van den gherechte gerne verhoet saghen gebieden daeromme ende bevelen allen scipheeren ende reeders van scepen poirteren ende inwoenneren deser stede dat nyemant hem en vervoirdere te reysen oft ghelt te geven ennigen scipheeren omme ennige scepen te halen voere ende eer dat de dachvaert die deser materien aengaende gehouden sal werden in den Hage by den Staten van Hollant Zeelant ende Vryeslant in Jaersavont toecomende gesloten sal zijn op de verbeurte van XL lb heeren ghelts heure poertrecht ende tot dien evenwel te ghelden an de costen die men doen sal omme dandere scepen te halen
CCCCXLV
1. Alsoe tweder hem nu by der verhenckenisse Goids stelt tot vorst daerby der goeder stede pericule soude moghen oevercoomen by brande ende anders dat mynen heeren van den gherechte gaernne verhoet saghen ordineren daeromme ende bevelen dat alle scipheeren hebbende scepen leggen in Damrack allomme heure scepen vier roeden leggen van den jucken alsoewel an dOude zyde als an de Nuwe zyde binnen desen daghe op de boete van I lb heeren ghelts op elck scip te verbeuren dat nae desen dach anders sal worden bevonden te leggen by tyde van vorst
2. Item dat men alle dennen van den scepen leggende in Damrack sal gheheel openen ende open laten leggen soeverre die gheen verderffelijcke goeden in en hebben op de verbeurtte van een lb heeren ghelts op elck scip te verbeuren soe dic ende menichwerven als yemant bekeurt sal werden
3. Item dat de scepen hebbende geladen verderffelijcke goeden ende [die] merctscepen zijn leggende op heure wint ende weder omme ter marct te vaeren oft op andere reysen die sullen heure dennen moghen gesloeten houden mits daerinne latende slapen alle nacht een man omme te verhoeden dat de stede ende poirteren van dien daerby gheen pericule en crygen want men dat andenghenen dient scip toebehoerde sall verhalen mair die nyet op heure marct en leggen oft andere reysen sullen heure goeden die verderffelijcke zijn an lande slaen ende voertan heure dennen openen ende open houden leggende als andere leeghe scepen tusschen dit ende Jaersdach indient vryesende blijft op de boete van een lb heeren ghelts te verbeuren soe dickwyle als yemant bekeurt sal werden
CCCCXLVI
1. Ordineren ende bevelen voert dat alle waerden ende waerdinnen houdende slapers omme ghelt van desen daghe sullen coomen mit heure slapers ten huyse van den scout latende heure namen ende toenamen scriven ende dat zy oick van nu voertan gheen slapers die hier binnen der stede heure broot nyet en winnen mit iarbeyden langer en sullen moghen houden dan twe nachten op de correctie van der stede Ende dat soe wye hier twe nachten in sulcken schyne geweest ende geslapen sal hebben nyet weder binnen deser stede en sal moghen coomen binnen op de pene van tot ewigen daghen gebannen te wesen uuyter stede Ende oft yemant daerenboven binnen deser stede quame die sal men openbaerlijcken gheeselen op de Plaetse ende daernae tusschen twe sheeren dienaeren uuyter stede geleyt werden
2. Item dat nyemant van sodanigen waerden oft waerdinnen van nu voertan sulcke gasten en sal moghen ontfangen tenzy dat die gasten een passepoirte hebben van den scout dat zy hier binnen der stede moghen wesen op de correctie van der stede
CCCCXLVII Item dat alle dieghene die gheen geboeren ondersaten en zijn van onsen genadichsten heere den eertshertoge van Oystenrijck ende binnen een half jaere hier binnen der stede zijn gecomen woenen ende gheen poirters geworden en zijn hen sullen voeghen te gaen uuyter stede ende heure vryheyt ende hen daeruuyt houden tot ewigen daghen op de correctie van der stede Ende dit sal staen tot sgerechts proeven
CCCCXLVIII Item gebieden voert dat nyemant van voertan an der stede vesten en sal moghen tappen dan by de volle mengelen te halen sonder yemant te setten ende dat oick nyemant hem en vervoirdere an der stede vesten te tappen by de mengelen noch anders nae negen uren des avonts op de verbeurtte van een lb Hollants soe menichwerven als yemant bekeurt sal werdden
CCCCXLIX Item dat nyemant van den wakers omme der stede hem en sal vervoirderen ennige scuttingen aff te breecken omme te verbranden op de correctie van der stede ende dat te verhalen an den capiteyn ten waere dat hy de schuldige man konde noemen
CCCCL Alsoe tweder by der verhenckenisse Goedts soe hem stelt ende saken van der werelt soe ghelegen zijn dattet noot is alle goede steden wel te bewaeren ende dat alle dinghen by regule ende ordinancie gedaen starcker zijn dan deselve gedaen sonder ordinancie soe ist dat mynen heeren van den gherechte begherende ende willende alle bescaempheeden verhoeden soevele als in heil is ordineren ende willekeuren sulckx als hier naevolght
1. In den eersten dat alle poirteren ende inwoeneren deser stede op morghen hen sullen voughen te wesen op heure hooffslagen mit heure harnasch ende geweer als zy heure lijfven willen verweeren ende heure doottvianden verwachten voere dat der stede clocke die beghinnen sal te luyden te eendalfuere tot eender uren toe aflaet ende dan op heure hoofslagen bliven ter wylen ende tijt toe dat der stede clocke die daernae weder beghinnen sal te luyden aflaet op de verbeurtte van drie lb Hollants ende correctie van der stede
2. Ordineren voert ende bevelen allen vreempden luyden hier binnen der stede sijnde jastsgewijs dat zy op morghen ten voirscreven tyde bliven in heure herberghen sonder daer uuyt te gaen in enniger manieren op de verbeurtte van heure oeverste cleet ende correctie van der stede
3. Item dat van nu voertan totdat anders geordineert sal werden alle dieghene wye zy zijn die hier binnen der stede coomen logeren oft uuyt willen reysen heure passeportten sullen halen ten huyse van Gyelijs de wisselaere op den hoeck van den middeldamme Rutenborch ghenoempt Ende dat gheenen waerden noch waerdinnen binnn deser stede wye die zijn yemant en sullen moghen ontfanghen tot vasten tenzy dat sodanige vreempde luyden eerst ende allvoeren een passepoirtte hebben van den voirscreven Gielijs dat zy daer ter herberghe sullen wesen op de verbeurtte van een lb heeren ghelts ende correctie van der stede
4. Item dat alle vreempde luyden die op desen tijt binnen deser stede zijn gastsgewijs oft als slapers dat zy binnen desen daghe mit heure waerden oft waerdinnen coomen by Gielijs de wisselaere voirscreven halende van hem een passepoirtte dat zy daer ter herberghe zijn ende sullen moghen wesen op de verbeurtte van een pont Hollants
5. Item dat alle scutteren die van nu voertan angesproken sullen werden omme in de poirtten te sitten hen sullen voegen te zijn voere zeven uren des morghens voere de vierschaere omme mitten burgermeesteren te gaen in sulcke poirtten als heil dan bevolen sal werden op de verbeurtte van een lb Hollants ende dat alle schutteren van nu voertan heure messen op heure zyden sullen draghen
6. Item dat [men] van nu voertan totdat anders geordineert sal zijn desen nacht beghinnende sal waken mit dobbelde wake omme de achte nacht rontomme der stede ende des avonts voere zeven uren te wesen op de wake voere daflaten van de clocke die te zevendalfure sal beghinnen te luyden ende des morgens nyet weder afgaen voere dat der stede clock aflaet van luyden op de boetten van outs daertoe staende
7. Item bevelen allen scipheeren van grooten scepen hebbende bossen leggende in heure scepen dat zy die an lande brenghen oft ten minsten die cameren van dien van desen daghe uuytgeseyt de scepen daer waken op geordineert zijn op de boette van een lb Hollants op elcke bosse te verbeuren
</main>
<end>
</end>