Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1612_1

<begin>
</begin>
<main>
Op naervolgende conditiën sijn metten anderen overcommen ende veraccordeert Jacob Dircxsz Meulegraeff als lasthebbende van Willem Wiertsz wonende tot Coignack in Vranckrycke ter eenre ende Heynrick Jansz jonckgezel cuyper van sijn ambacht uuyt Oostlant ter andere syde in deser manieren te weten
de voors Jacob Dircxsz heeft aengenomen d' voors Heynrick Jansz die oock bekent hem verbonden te hebben omme tot Cognack voors by d' gemelte Willem Wierts te wonen ende hem te dienen in het cuypen wijn verlaten ende brandewijn branden ende in allen tgene des aencleven mach ende dat voor den tijt van twee jaren die innegaen sullen soo haest d' voors Heynrick Jansz dewelcken belooft hem met d'eerste gelegentheyt op reyse te geven tot Cognack voors sal gearriveert sijn ende desen aen den voorn Willem Wiertsz verthoont hebben voor welcken dienst d' voors Willem Wiertsz voor d' welcke d' gemelte Jacob Dircxsz Meulegraeff belooft ende vast staet aen de voors Heynrick Jansz sal laten gewerden ende genieten de vrye cost woninge slapen wasschen ende voordere nootdruft met alle syne dagelijcxe werckclederen ende bovendien t'eynde van de voors twee jaren twaelff car g tot 20 stuyvers 't stuck eens in gelde Behalven oock dat d' gemelte Meulegraeff belooft d' voors Heynrick Jansz in 't gaen ofte varen tot Cognack toe te vryen ende vry te houden van schipvrachte ende teercosten Des belooft hy Heynr Jansz mede hem in alle tgene voors is soowel synen dienst aengaende alsoock in alles te soucken sijns meesters meeste voordeel ende prouffijt wel ende trouwelijck te quyten ende te dragen soo een goet gezel betaemt ende toebehoort Alle twelck syluyden belooft ende by desen aengenomen hebben den anderen getrouwelijck te onderhouden ende naer te gaen onder verbant van hunne respective persoonen ende generale goederen geene uuytgesondert die stellende ter bedwanck van allen rechten ende rechteren sonder argelist
</main>
<end>
des t'oirconde hebben syluyden respective de minute deses onder my notaris berustende onderteyckent
</end>