Compilatiecorpus Historisch Nederlands 1.0 (CHN): ambtelijke teksten 1250-1800: amsterdam_1632_7

<begin>
</begin>
<main>
Compareerden etc Adam Duyfkens soone van Aert Duyfkens ter eenre ende Jacob Pancras als man ende vooght van Nelletge van Immen die eertijts ten manne gehad heeft Aert Duyfkens zal ter andere zyde poorteren deser stede my notario bekent verclarende d' voors comparanten voorbedachtelijck met malcanderen in minne ende vruntschap wederomme opnieus beraemt ende aengegaen te hebben seecker contract van societijt ende compangyeschap nopende 't camelotten ende drucken van alderhande sayen cashanten ende wat dien aencleeft als oock 't heetparssen voor den tijdt van twe achter-den-anderenvolgende jaren in te gaen op den eersten Januarii eerstcomende in manieren ende opte conditiën hiernaer beschreven te wetene
1. Dat yder van hen comparanten sal gehouden sijn d' voors tijd geduyrende te wercken met sijn eygen gereetschap tsy wat hy sal comen te doen welcke respective gereetschappen partyen elck voor 't syne sal moeten leveren suyver ende niet gebroocken ende in sulcker gestaltenisse datter niet aen en hapert om mede te wercken
2. Des sal al tgeene aen de voors gereetschappen geduyrende dese compangye gebroocken soude mogen werden comen tot laste van dese compangye
3. Een yder sal gehouden sijn dese compangye geduyrende sijn eygen huyshuyr tot sijn zelfs laste te betalen
4. Is mede geconditioneert dat alle tgeene tot yders neringe op nieus gemaeckt sal werden wederomme by dengheenen tot behoeff van wiens neringe sulx gemaeckt is naer hem ten uyteynde van dese compagnie sal nemen tot taxatie
5. Soo sal oock hoewel sonder taxatie een yder van henluyden ter expiratie alsvooren sijn aengebrachte gereetschappen naer hem nemen ende daermede syne geliefte mogen doen
6. Ende sal winste ende verlies staende dese compangye te vallen ende alle tgeene d'een ende d'ander van hun comparanten met syne neringhe sal comen te verdienen ten wedersyden half ende half gedragen ende geprofiteert of genoten werden
7. Des sal een iegelijck gehouden sijn alle mogelyke vlijt ende naarsticheyt tot welstand van de voors compagnye voor te wenden ende malcanderen t' allen tyden des versocht sijnde te doen goede ende deuchdelycke rekeninghe bewijs ende reliqua
8. Ende aengaende de rekeninghen by partyen ende yder van hen aen de coopluyden te leveren sullen partyen samen moeten ondertekenen
9. Is wyders bedongen dat in plaetse van een knecht in dese compangye gebruyckt sal werden Aert Duyfkens ende hem voor sijn dienst betaelt werden alle weecken vijf gulden dese compangye geduyrende
10. Ende alsoo Isaack Duyfkens voor den dienst die hy de compangye heeft kennen doen genoten heeft alle weecken een daelder is geconditioneert dat hy in de compangye sal continueren ende alle weecken voor sijn dienst genieten drie gulden
11. Gelijck wyders bedongen ende by dese compangions overgegeven is dat Emerens ende Jacob Duyfkens dese twe jaren geduyrende uyt dese compangye sullen genieten elck 70 gulden jaerlix
12. Dese compangye eduyrende en sal niemant van partyen vermoghen met een ander in compangye te treden sooveele dese handelinghe ofte compangyschap is aengaende ofte met niemant in 't cleyn of groot van sulx mogen doen noch oock uyt dese compangye mogen scheyden andersins op een boete van 600 guldens ten profyte van den armen
</main>
<end>
</end>