Compilatiecorpus Historisch Nederlands 1.0 (CHN): ambtelijke teksten 1250-1800: antwerpen_1306_1

<begin>
Wi ard van der molen ende willem van der dilf Scepenen in andwerpen maken kond allen den ghenen die dese lettre zelen zien ochte horen lesen
</begin>
<main>
dat voor ons komen es in propren personen clais strubolle de oudecleder vercopre die woend in groot coppens holle ende verliede dat hi vercocht heeft den godshuse van sente bernards op thuus daer hi in woend dat staed op svoorghenoomds gods huus eyghin dat hi hout ter stat rechte van den voorghenoomden gods huse twintigh s zwarter tornoise siaers eerfleke omme ene summe van ghelde die hi verliede dat hem wel vergolden was te gheldene telken sente baues daghe of de waerde der af in andren paiemente behoudeleke den cenze die tvoorghenoomde godshuus heeft an dat eyghin daer tvoorghenoomde huus op staed
</main>
<end>
Jn orkondscepe van deser ding zo hebben wi onze zeghele ghehanghen an dese lettre Die was ghemaect int Jaer ons heren als men screef M ccc ende sesse svridaeghs na sente Jacobs dagh ende Sente christofers
</end>