Compilatiecorpus Historisch Nederlands 1.0 (CHN): ambtelijke teksten 1250-1800: antwerpen_1306_3

<begin>
Wi claeus van winegheem ende pieter daen scepenen in antwerpen maken kond allen den ghenen die dese lettre zullen zien ochte horen lesen
</begin>
<main>
dat voor ons comen is in propren persone Zegher de kersemaker ende verliede voor ons dat hi sculdigh is den godshuse van sente bernards twelef s louensche Siaers erfleke van der hofstad daer zijn huus op staed in de coeportstrate te gheldene van hem Ende van zinen nacomelinghen telken sente baues daghe alle iare in alzulken paijemente als daer men shertoghen cins mede gheld voord ane verliede voor ons Zegher voorghenoomt dat hi sculdich ware den voorghenoomden godshuse vier pond ende tien s zwarter tornoise ochte de waerde der af Sjaers erfleke op de voorghenoomde hofstad ende op thuus datter op staed med al datter toe hoord te gheldene den voorghenoomden godshuse telken sente steuens daghe naest den carsdaghe van Zeghere voorghenoomt ende van zinen nacomelinghen alle jare
</main>
<end>
Jn orkondscepen van deser ding zo hebben wi scepenen voorghenoomd onze zeghele ghehanghen an dese lettre die was ghemaect int jaer ons heren als men screef M CCC ende zesse Ssondaeghs voor sente katelinen dagh
</end>