Compilatiecorpus Historisch Nederlands 1.0 (CHN): ambtelijke teksten 1250-1800: antwerpen_1306_4

Wi pieter daen ende arnoud van der molen scepenen in andwerpen maken kond allen den ghenen die dese lettren zullen zien ochte horen lesen

dat voor ons comen ziin in propren personen her gillis van campenhout ende broeder heinric die buschere ende verlieden voor ons dat zi van sabtsweghe ende van scovents weghe van sente bernaerds van der ordene van cystens ghegheven hebben pietren arnouds zone van orderen ende woutren bortsarde van wilmaersdonc twee buenre moers luttel min ochte meer welke twee buenre moers wilen waren skier godevaerds roden canonec was in onzer vrouwen kerke tandwerpen ende daer na godevaerds roden zijns zoens om viertiene viertalen arder evenen erfleke te gheldene ende te livererne den voorghenoomden abt ende den voorghenoomden covente van pietre ende van woutre voorghenoomt ende van haren nacomelinghen in de vier carsdaghe alle iare bi der andwerpscer mate in hare huus te andwerpen Voord ane gheloveden voor ons pieter ende wouter voorghenoomd te gheldene allen den cins diere ute gaet ende ooc gheloveden zi dit voorghenoomde land te houdene ende te dikene ende al den cost te doene die dit land sculdegh es te doene ghelijc den lande datter an beden ziden an leghet zonder cost ende scade sabts ende scovents voorghenoomd Voord ane waer ooc dat zake dat den abt ende den covente voorghenoomt van allen desen voorseiden stucken hiet ghebrake ochte dat pieter ende wouter voorghenoomt tvoorseide land lieten varen zo gheloveden voor ons pieter ende wouter voorghenoomt den voorghenoomden abt ende covente twelf pond als tenen onderpande dewelke twelef pond de abt ende tcovente voorghenoomt innen moghen op pietre ende woutre voorghenoomd ende op hare nacomelinghe als haren onder pand ende hand slaen and voorghenoomde land Woord ane waer dat zake dat dit voorghenoomde land voor den oust ute ghinghe ende ridende bleven zo ne zouden si ghenen cins gheven alze langhe alst rede Ende waer dat zake dat men tland weder anevinghe ende dikede zo zouden pieter ende wouter tvoorghenoomde land ane vaen ende diken ghelijc den lande dat hem an biden ziden gheleghen is zonder cost ende scade sabts ende scovents voorghenoomd ende ghelden de voorghenoomde viertiene viertale evenen alzo alst hier voren ghescreven is

In orkondscepen van deser ding zo hebben wi scepenen voorghenoomd onze zeghele ghehanghen an dese lettre die was ghegheven int jaer ons heren als men screef m ccc ende zesse ssondaeghs voor sente katelinen dagh
</end>