Compilatiecorpus Historisch Nederlands 1.0 (CHN): ambtelijke teksten 1250-1800: antwerpen_1306_5

<begin>
Wi arnout vandermolen ende willem vander borgh scepenen in andwerpen maken kond allen den ghenen die dese lettre zullen zien ochte horen lesen
</begin>
<main>
dat vore ons comen is in propre persone arnoud faeszone ende verliede voor ons dat hi vercrocht heeft pieter dane onsen scepene willem draken ende arnoude cariolf op die drie deel van sinen huus dat staet op den hoec van der potter strate ter potter brugghe waerd op sinen kelre die onder die potterbrugghe staet ende op alf thuus daer heinric die cogghemakere in woend naest der potter brugghe ende op alt recht dat hi heeft in husinghen in kelre ende in die hofstaden daer die voreghenoemde husinghen op staen ses pond sjaers erfleke te gheldene ende te ghevene elke jare van Arnoude faeszone voreghenoemt ende van zinen nacomelinghen pieter dane willem drake ende arnoude cariolve voreghenoemd ende haren nacomelinghen ten terminen die hierna bescreven staen dats te wetene die ene helft tsente jans daghe in midden zomere ende dander helft te kersavende den groten ouden tornoisen van sconinghs lodewycs ende sconings philips slaghe van vrankerike goed ende custbare vore hachtien penninghe gherekent
</main>
<end>
In orkonde van desen brieve beseghelt met onsen zeghelen Dit was ghedaen int jaer ons heren als men screef m ccc ende zesse op sente gregoris dagh
</end>