Compilatiecorpus Historisch Nederlands 1.0 (CHN): ambtelijke teksten 1250-1800: antwerpen_1307_1

<begin>
Wi claus van winengheem ende pauwels bornecolve scepenen in antwerpen maken cont allen den ghenen die dese lettere zelen zien ochte horen lesen
</begin>
<main>
dat vore ons ende vore die lantheeren comen es jan van oerdren ende heeft op ghedreghen janne den wayere ende sinen nacomelinghen syn huis dat hi heeft staende in die zilversmitstrate tusschen peters van der leyen ende claus van hackendonc ende alt recht dat hire ane heeft tenen pande over tiene pont tsjaers te eewelaken daghe den groeten ouden tornoysen van sconings monte van vrankerike goet ende custbare gherekent vore vyftien penninghe suerter tornoise behoudelake der lantheeren rechte dats te verstane dat tlant daer thuis op staet staet ter stat rechte die welke tien pont tsjars voerghenoemden behoeren zelen tere capelrien die men verdienen sal in die firmarie in claepdorp ende men salze ghelden te tuuen tide tsjars die eene helft in sente jans daghe in midden zomere ende die andre helft telken kersavondedie welke capelrie te verdienne jan die Wayere voerghenoemt ochte syn hoyr dat na hem blijft eenen papen hueren sal alre jare misse te segghene elcs daegs toter tijt dat dese provende so groet es ende also goet dat menre eenen pape op wien mach ende dan sal die ghichte van deser capelrien ierst werven te ghevene staen an jan den wayere voerghenoemt ochte an syn hoyr ende dat bi den rade der gheerre die dese provende beteren selen ende die pape die dese provende verdienen sal moet alle daghe misse segghen ende alse hi ghene misse en seghet daghelics so en sal hi niet hebben van dien daghe maer die firmarie zaelt hebben
</main>
<end>
In oerconde van desen brieve beseghelt met onsen seghelen Dit was ghedaen int jaer ons heeren alse men screef m ccc ende sevene op den andach van sente martyns daghe in den winter
</end>