Compilatiecorpus Historisch Nederlands 1.0 (CHN): ambtelijke teksten 1250-1800: antwerpen_1307_2

<begin>
Wi claus van winengheem ende pauwels bornecolve scepenen in antwerpen maken cond allen denghenen die dese lettre zelen zien ochte horen lesen
</begin>
<main>
dat vore ons ende vore die landsheren comen es jan van ordren ende beliede vore ons ende bekende dat hi ghegheven heeft den heleghen gheest in onzer Vrouwen kerke bin Antwerpen twelf pond sjaers te eweleken daghe zwarter tornoise den groten ouden tornoisen van 'sconings monte van vrankereke goed ende custbaer vore vijftien penninghe gherekend zwarter tornoise die welke twelef pond sjaers voreghenoomd hi bewijsde vore ons te heffene ende te ontfane vant huus dat hi heeft staende inde zelverrninstrate tusschen Pieters huus van der Leye ende Claus van Ackendonc ende an alt recht dat hire an heeft alle jare die ene helft telken sente jans daghe in midden zomere ende die ander helft telken kersavonde behoudenlec der lettre die Jan die Mayere heeft die spreect van tien ponden sjaers
</main>
<end>
In orconde van desen brieve beseghelt met onzen zeghelen Dit was ghedaen int jaer Ons Heren als men screef m ccc ende zevene op den andach van sente Martine
</end>