Compilatiecorpus Historisch Nederlands 1.0 (CHN): ambtelijke teksten 1250-1800: antwerpen_1307_3

<begin>
Wi claus van winengheen ende pauwels bornecolve scepenen in Antwerpen maken cond allen denghenen die dese lettre zelen zien ochte horen lesen
</begin>
<main>
dat vore ons comen sijn volprecht codde ende laurens die madere proviseurs vanden heleghen gheest in onzer vrouwen kerke binnen antwerpen ende belieden ende bekenden vore ons dat die heleghegheest sculdegh es petre jans zone van ordren te zinen live ende een jaer langher na zijn lijf twelef pond zwerter tornoise sjaers den groten ouden tornoisen van sconings monte van vrankerike goed ende custbaer vore vijftiene zwerte tornoise gherekend te gheldene ende te ghevene petre voreghenoomd ochte den hebbere van deser lettre die ene helft telken sente Jans daghe in midden zomere ende die ander helft telken kersavonde Die welcke twelef pond sjaers die proviseurs ontfaen zelen ende nemen van jans huus van ordren dat staed in die zelvermin strate tusschen peters huus vander leve ende claus van ackendonc behouden der lettre die jan die wayere heeft die spreect van tien ponden sjaers in manieren ware dat sake dat boven desen tien ponden voreghenoemd ghene twelef pond en quamen sjaers zo en zal die heleghe gheest nemmeer gheven dan hire af ontfaet
</main>
<end>
In kennissen van desen stucken zo hebben dese voreghenoomde proviseurs den zeghel sheleghs gheests ende wi scepenen voreghenoomd onze zeghele ghehanghen an dese lettre Die was ghemaect int jaar ons heren als men screef m ccc ende zevene op den andagh van sente Martine in den winter
</end>