Compilatiecorpus Historisch Nederlands 1.0 (CHN): ambtelijke teksten 1250-1800: antwerpen_1311_1

Wi pauwels bornecolve ende peter daen scepenen in Antwerpen maken cont

dat vore ons comen es jan rurvoet arnouds sone ende heeft bekint dat hi sculdech es ghisele arnde janne ende clause sinen wetteghen kindren drie hondert pont enen groten tornoisen van des conings monte van vrancrike over neghentien penninghe gherekent in manieren dat jan vorseit sine vorseide kindre houden sal van etene ende van drinkene van cledren ende van dien dat te hen hoert loflec ende wale ende wanneer dat der kindre vriende den vorseide kindre hebben ende in andren steden doen willen ocht besteden oms beters wille so sal ment hem janne van den tween kindren laten weten een jaer te voren ende ten inde van dien jare moet van dien tween kindren gheven haer ghedeel van den vorseiden drienhondert ponden ende dan en mach men hem dandre twee kindre niet eeschen binnen dien naesten jare dat daer na volght maer wanneer dat dat jaer ut es so mach men hem dandre twee kindre eeschen ende dan moet hi jan also dat jaer ut es dien tween kindren oec gheven haer ghedeel van den voirseiden drien hondert ponden ende also langhe alse hi jan de vorseide summe ghels onder heeft so moet hi de vorseide kindre houden also vore gheseit es Voert gheloefde jan vorseit testament ende utlede ende onrecht sijns voirseids wijfs der vorseider kinder moeder te gheldene ende daertoe alle de scout die si te gadere sculdech waren sonder cost ocht scade der vorseider kindre ende hier mede so behoudt jan vorseit ende ghebruict alle dies gueds dat hi ende der vorseider kinder moeder te gadre houdende ende hebbende waren beide dat van hare quam ende dat van hem quam rurlec ende onrurlec waer dat gheleghen es ocht hoe dat gheheten es Vordane quamen voer ons der vorseider kindren montboren dats te wetene arnout clap arnoud van den inde ende dankaert de moelnere ende scouden quite van der vorseider kinder weghen alle dat guet dat hen behoren soude ende mochte van dode der vorseider kindre moeder rurlec ende onrurlec ende verteghens also dat de kindre vorseit daer ane niet en hebben noch gheens rechts daertoe vermeten en moghen

In kinnessen van desen brieve beseghelt met onsen seglen Dit was ghedaen int iaer ons heren als men screef dusentech driehondert ende eleve te belokenen paeschen