Compilatiecorpus Historisch Nederlands 1.0 (CHN): ambtelijke teksten 1250-1800: antwerpen_1351_1

<begin>
Wij woutere vanden broeke ende laureins volcart Scepenen jn antwerpen maken cond
</begin>
<main>
dat vore ons quam jan wilmaer zoene claus wilmaers ende bekende dat hi ghegheuen heeft in gherechtere ende in ghestadeghere ghichten clause vanden werue Sinen swagher ofte den hebbere van derre letteren alle dat guet ligghende ende Rurende welkerande dat es Soe waer dat gheleghen es ende vonden wordt dat hem verstoruen was ende behoerde van doede vrouwen margrieten die wittelec wijf was Sher Robbeerts van galinden Ridders wilen siere moeyen pais[in]lec ende Rastelec dat goet te houdene ende te besittene ende vrilec dies gueds te ghebrukene den seluen clause ofte den hebbere van derre letteren ende sinen vrien wille daer mede te doene ghelijc siins Selfs propren guede sonder yemens wedersegghen Dat welke guet met allen sinen toe behoerten ende rechte dat hi daer ane houdende was de vorghenomde jan wilmaer op droech met vertiene den Seluen clause ende quite scout tsinen behoef ende gheloefde oec mede dat hi den vorghenomden clause vanden werue ofte den hebbere van derre letteren sal in dat vorghenomde guet doen ende eruen vore hof ende here met den vonnisse Ende waert dat des vorghenomden jans wilmaers erfghenamen oft anders yement van horen weghen de vorghenomde ghichte ende guede calengieren ende wedersegghen wouden oft in andren manieren eenegherande zaken toenen ende voert setten wouden in Rechte daer de vorghenomde ghichte mede belet wesen mochte voert te gane Soe bekinde vore ons de vorghenomde jan wilmaer dat hi alse nv sculdech es van witteghere scoud op al dat vorghenomde guet den vorghenomden clause ofte den hebbere van derre letteren Dertech ponde oudere groter tornoysen van Munte Sconings van vrancrike te gheldene ende te gheuene gheheelec ende al ten vermanene ende simplen Segghene des vorghenomden claus oft tshebbers van derre letteren sonder proeue oft eedt daer af te doene ende sonder mindernisse ende afslaen vander vorghenomden princepaelder scoud Mids vrucht ende vromen die de vorghenomde claus vanden werue ofte de hebbere van derre letteren vanden vorghenomden guede opghehauen ende ontfaen hadden in eeneghere manieren Ende hier toe soe heeft de vorghenomde jan wilmaer dat vorghenomde guet met allen dat daer toe behoert verbonden ende te pande gheset tenen gherechten onderpande
</main>
<end>
Jn kennissen van desen letteren bezeghelt met onsen Seglen Ghegheue int jaer ons heren alsmen screef M CCC vijftech ende een des derds sdaghs vore sente lucien daghe
</end>