Compilatiecorpus Historisch Nederlands 1.0 (CHN): ambtelijke teksten 1250-1800: antwerpen_1391_1

<begin>
</begin>
<main>
197. Item alle de ghene die huyse staende hebben binnen den binnensten vesten van Antwerpen die met stroe ghedect sijn dat die binnen drien jaeren nu yerst comende sonder langer vertrec tstroe daer af altemale af selen moeten doen Ende die huyse weder moeten doen decken met tichelen oft met leyen oft soe langhe laten staen onghedect tot dat zy met tichelen oft met leyen ghedect sijn Dies niet en daden soe soude de heere ende de stat dat huys selue doen decken met tichelen oft met leyen Ende de ghene dies thuys ware soude den cost daer af dubbel moeten betalen half den heere ende half der stat Item dat niement die stroen huyse heeft binnen den binnensten vesten van Antwerpen hier en binnen niet en selen moghen die huyse doen stoppen het en ware half thuys te male 1 oft ten minsten een vierendeel met tichelen oft met leyen die de contrarie dade soude verboren x royale half tsheeren behouf ende dandere helft ter stat behouf Item dat elc sijn huys binnen desen termine sal moghen doen decken met tichelen teenen male of half te male oft een vierendeel te male ende niet min sonder begrijp in manieren dadt emmer voldect moet sijn binnen desen drien jaeren met tichelen oft met leyen Item waert dat eenich brant quame binnen den binnensten vesten dat God verhueden moete binnen desen termine dat dan een yeghelyc diere stroenen huyse binnen hadde eenen weerachtighen man op sijn huys soude moeten hebben met eenen slaeplakene ende een leedere ane thuys vij voete lanc oft meer ten minsten bouen tnederste dac Dies niet en dade soude verboren x royale ghelijc oft den brant vut sinen huyse comen ware half sheeren behouf ende half ter stat behoef
198. Item dat gheen backere die binnen den binnensten vesten woent gheenen mutsaert hebben en sal moghen binnen den binnensten vesten ligghende teenegher stede meer dan een vijftich mutsaerds te male Daermen de contrarie vonde die backere soude verboren twee royale half sheeren behouf ende half ter stat behouf alsoe dicke alst ghesciede Item de backers die binnen den butensten vesten woonen dat die gheenen mutsaerdt naerdere haren ouene en selen moghen legghen dan hondert voete verre vanden ouene opten vors coere Item dat de backers ende bruwers alle gadere sullen moeten houden ende doen de coren die haren ambachte anerueren die tcoerboec begrepen heeft alse van tinen van watere ende van haren esten opten coere diere op staet Item soe selen all dese backers die mutsaert meer oft naerdere haren huyse hebben dan voerscreuen es dat die haren mutsaert selen moeten doen ruymen ende verlegghen also bouen bescreuen staet tusschen nu ende datmen yerst marct vrede blasen sal opten vors coere Item viele eenich brant binnen den butensten vesten dat dan een yeghelic die stroen huyse hadde eenen man op dat huys hebben soude met eenen naten slaeplakene ende met eenre leederen Ende dat sal de ghene verwaren dies thuys es ende elc sal hem pinen sijn huys nernstelec te bescuddene vanden vlieghenden viere Ofte waert datter eenighe scade af quame dat soudemen soe corrigeren biden heere ende bider stad ane den ghenen dies niet verwaert en hadde dats andere exempel nemen souden hem te houdene ende des en soude men niemene verdraghen Item gheuiele eenich brant dat dan elc backere sijn vier vuten ouene blusschen ende vut doen sal ende elc bruwere sijn vier vuter esten opten coere diere op staet oft op de correxie die de heere ende de stat hem daer af setten selen
199. Item want int jaer voerleden gheordeneert es biden heere ende bider stat dat men alle de huyse binnen den binnensten vesten staende die met stroe ghedect sijn binnen tween jaeren naest comende met tichelen moet doen verdecken of met leyen daer men noch sonder eenich verdrach bi meynt te bliuene ghelijc dat dordenanche doen ghemaect begrepen heeft ende want de goede liede die stroene huyse hebben binnen den binnensten vesten alle qualic ghereedscap hier en binnen daer toe ghecrighen mochten van werclieden het en soude hem ter groter cost meer moeten comen soe es omme ghemeen profijt vanden goeden lieden ghemeenlec vander stat gheordeneert int jaer xcij viij daghe in julio dat alle goede cnapen timmerliede metsers ticheldeckers ende leemplackers van buten binnen desen ij jaeren naest comende binnen Antwerpen sullen moghen werken op haer kersghelt sonder verboren ende zij en doruen gheene poerters worden zij en willent doen
</end>