Compilatiecorpus Historisch Nederlands 1.0 (CHN): ambtelijke teksten 1250-1800: antwerpen_1394_1

<begin>
</begin>
<main>
Dat alle de ghene die stroen huyse staende hebben binnen der stat binnen den binnensten vesten tstroe van haren huysen af doen selen ende ontdecken tusschen dit ende den vierden dach van oeghste yerst toe comende ghelijc alse tghebot dat in tiden vorleden van sheeren ende vander stat weghen daer op ghedaen es in houdt ende op de peyne die daer op staet soe dat een yeghelijc sine scade daer af verhoede want mens niemende verdraghen en sal
Item dat alle metsers tymmerliede ende alle warcliede die ane huyse warken willen binnen Antwerpen warken selen moghen huyswarc een jaer lanc na den vierden dach van oeghste vors op hare kersghelt ende ghelijc alse zij dese drie jare vorleden ghedaen hebben onghecalengiert
Item dat men gheene smoutmolene oft slachmoelne daermen smout in slaet setten en sal moghen noch maken noch smout slaen binnen den binnensten vesten van Antwerpen op de peyne van hondert royalen sheeren behouf ende thuys oft moelne af breken moeten
Item waert dat yement enighe brieve oft lettren ghecreghe ane enighen heere van enighen ghiften die vormaels niet ghecostumeert en hebben gheweest ende die onse heeren van Antwerpen vormaels niet ghegheven en hebben ende die ieghen sheeren heerlicheyt ende ieghen ghemeyne profijt vander stat ende vanden goeden lieden ghemeynlec vander poerten gaen mochten dat die verboren soude twee hondert royale sheeren behouf ende tiene roeden gariten ter stat behouf van Antwerpen die te makene daermense hem vander stat weghen van Antwerpen bewisen soude
Item dat gheene voorcoepers svridaeghs noch tzaterdaeghs gheenrehande plancken coepen en selen noch doen coepen die van buyten tAntwerpen comen omme voert te vercoepene het en zij te haers selfs bezeghene op de pene van tiene royalen sheeren behouf Ende daer af sal de heere eed hebben moghen alsoe dicke alse hi wille beide vanden coepere ende vanden vercoepere
</main>
<end>
</end>