Compilatiecorpus Historisch Nederlands 1.0 (CHN): ambtelijke teksten 1250-1800: antwerpen_1545_1

<begin>
</begin>
<main>
TITEL I JURISDICTIE ENDE ADMINISTRATIE VAN JUSTICIEN TER HOOGHER VIERSCHAREN ENDE INT CRIEM

##

TITEL XIV PRESCRIPTIE
1. Item naecte possessie van licht sceppinghe waterloopen ende dier gelycke servituyten die en prescriberen nyet oft en gheven gheen recht sonder anderen wettighen tytel
2. Item een die besidt eenige onruerende goeden oft renten die vercrycht recht by prescriptie oft verloop van tyde soo verre hy daeraf heeft gehadt vreedelycke possessie van seventhien jaeren seventhien weken seventhien daeghen ende seventhien uren en [ende] by dien verloope van tyde heeft hy geprescribeerde possessie vanden selven goeden behoudelycken altyt dat totter [totter] voorscreven possessien hy hebbe wettigen title totten selven goeden
TITEL XV CESSIE
1. Item naeder stadt recht en pleghe [plach] nyemant cessie te moeghen doene hy en moeste yerst vj weken lanck opden Steen voer syn schult gevangen geseten hebben ende daer nae moeste hy alle de crediteuren doen daghen om hem cessie te comen syen doene ende syne goeden te aenveerdene
2. Item de crediteuren allegader gedaecht synde ende comparerende oft nyet soe verre de crediteuren oft eenighe van hen nyet en costen bewysen dat de debiteur fraudulentelick hadde gewandelt ende gehandelt int maken van syne schulden alsdan werde gewesen voer een vonnisse soe verre de debiteur derste [dorste] leggen handt op heylighen ende zweeren dat hy egheen gelt goet oft substantie en hadde oft en wiste hem toebehoirende om syn crediteuren te betalene ende dat hy alle syne goeden actien ende crediten te voerschyne gebracht ende overgegeven hadde tot behoeff synder crediteuren sonder dat hy yet daer aff hadde versteken verdonckert verborghen oft achterwaert gehouden in frauden van synen crediteuren by hem selven oft anderen in eenigher manieren dat hy oick nyemande ter werelt en wiste te vindene die voer hem borghe bliven wilde oft geloefte doen om syn crediteuren te contenterene ende dat hy voordane synen vuytersten beste doen soude om syn broot te winnene ende ingevalle hy yet conste veroeveren boven synen nootsakelycken montcost ende onderhoudinghe oft dat hem by successien oft anderssins yet toequame oft gegeven werde oft dat hy by eenighen middele tot betere fortunen quame dat hy dat al te samen altyt synen crediteuren soude laten hebben ende volghen totter volder betalinghen toe van heuren crediten etc dat alsdan dien eedt gedaen synde de debiteur soude van dan voortane ontslaghen syn vander hachten daer inne hy geseten hadde dies soe souden de crediteuren hem moeghen selve aenveerden ende gevanghen houden nae heurder belieften settende den selven boven der eerden onder tdack dichte ende drooghe ghevende hem waters ende broots genoch ende oick stroos genoch om op te liggene doende hem ane tusschen knyen ende knoesselen soe vele ysers als hem goedt dochte sonder seer oft wee te doene in sulcker vueghen nochtans dat syne vrienden maghen ende andere hem altyt binnen sonneschyne mochten begaen ende bestaen ende soe verre de crediteuren hem alsoe nyet aenveerden oft houden en wilden dat hy alsdan doende den voirseyden eedt soude syn ende bliven ontslaghen vander hachten
3. Item een die cessie gedaen heeft verliest syn poorterie maer is hy in een ambacht dat mach hy noch bliven doende om syn broot te winnene sonder anderssins hem metten poorters rechte te moeghen behelpene
4. Item een die cessie gedaen heeft blyft altyt infaem en mach nemmermeer getuygenisse draghen noch staet noch officie van sheeren oft vander stadt weghen vueren
5. Item ingevalle dat bevonden wordt dat yemant die cessie gedaen heeft ende synen eedt gedaen als voere yet heeft versteken oft verborghen by hem selven oft anderen in frauden vanden crediteuren die wordt gecorrigeert als een dieff
6. Item wanneer yemant cessie gedaen hebbende draecht eenen gevoederden tabbaert oft cleet het sy met pelterien met vullen [wullen] oft syden lakene oft andere dublure hoedanich die sy die voederinghe moeghen de crediteuren in dient hen belieft hem altyt afnemen ende vercoopen tot voldoeninge toe heurs credits insgelycx in gevalle dat hy meer gelts heeft dan ij scellinghen Brabants dat moeghen de crediteuren altyt aenveerden in betalingen als voere
7. Item de crediteuren van eenen die cessie gedaen heeft moeghen oick aenveerden syne successienlegaten donatien ende al dat hem toecomen mach by wat tytle dat het sy soe langhe tot dat sy te vollen betaelt syn vuytgesteken syn alimentatie ende synen verdienden arbeyts loon
TITEL XVI CALENGIERINGE BUYTEN INT QUARTIER VAN ANTWERPEN
1. Soe wanneer yemant eenighe leengoeden oft andere erfgoeden van bloetsweghen calengiert die calengierdere behoort te gestane betalende ende namptiserende binnen sonneschyne nae dat den coop duechdelyck by coopere ende vercoopere vercleert is ende dat de calengieringe hem wettelick bekent heeft geweest de principale hoodtpenningen goidspenningen ende lyfcoop sonder eenichsins gehouden te syne op versteken van synen rechte van calengieringen binnen dien tyde te moeten namptiseren oft betaelen de andere oncosten die [door] de [den] coopere oft vercoopere nae date vander calengieringen oft duerende der litis pendencien vander materien in cas van calengieringen ter saken van den processe ontfanghe oft erffenisse aenden heere ende wetten daer onder tselve resorteert mach oft moeghen gedaen syn maer die naecosten mach de yerste coopere naederhandt eyschen ende begheeren ende de calengierdere gestaet mids namaels daer af betalende tgene dat bevonden wordt dat hy daer aff schuldich is te restituerene
2. Die hem int goeden oft opdraghen van eenighen huysen erven oft lande ende onruerende goeden te waerborghe stelt die is schuldich den coopere oft coopers vanden selven goeden de voirscreven opgedragene huys lant oft rente te waren ende te clarene van allen voorchynsen lasten calengien commeren ende aenspraken inde opdracht nyet gespecificeert ende vuytgesteken staende ende dat ten eeuwighen daghen ten waere dat inden contracte anders ware ondersproken
3. Alle goeden ende gronden van erven gelegen onder Outsterweele soe wel leengoeden als andere syn inde successien al deylbaer ende haeffdeylich ende men mach die vercoopen als coeyen ende peerden vuyter handt
</main>
<end>
Dit syn de costuymen der stadt van Antwerpen soo die inden rade van Brabant syn overgesonden Anno 1545. Geteekend H DE Moy
</end>