Compilatiecorpus Historisch Nederlands 1.0 (CHN): ambtelijke teksten 1250-1800: antwerpen_1556_1

<begin>
</begin>
<main>
Wandt men binnen corten jaren herwaerts immers zeer onlanx Godt beetert bevonden heeft dat hier groote branden tot diversche plaetsen binnen deser stadt geschiedt ende gebuert zyn d'welck eensdeels ende principalick toegecomen is vuyt dien dat de huysen binnen deser stadt gestaen ende vernyeut den meesten deel vanden selven getimmert ende gemaeckt wordden met stagien ende gevelen van houte ende oick eensdeels vuyt dat de mueren vande selven huysen maer eenvoldich staen ende min dan voets dicke gemest [gemetst] ende gemaeckt wordden al tot grooten excessiven schaden ende onspreckelycke verliese vanden goeden lieden soo eest dat omme de groote inconvenienten te remedieren ende daer oppe te versiene voor zoo veele als mogelick ende doenlick is tot ghemeyne welvaert deser stadt ende oick mede dat de voorscreven stadt grootelycken daer by verbeetert soude moegen wordden ende daer oppe oick gehadt d'advys vanden raidtsluyden deser stadt men gebiedt van 's heeren ende vander stadts weegen dat nyemant van wat state ofte conditie dat hy zy hem van nu voortaene en vervordere ofte en pyne eenige huysen ofte looffven binnen den buytensten muer van deser stadt gestaen te doen maecken ofte te timmeren met eenige houten stagien oft gevelen voor aen der straten achter ofte ter zyden vanden selven huysen oft looffven maer selen die gemest [gemetst] ende gemaeckt moeten wordden met steenen ghevelen ende mueren tusschen beyden recht opgaende sonder eenige oversprongen ten alder minsten voets dicke ende indien de selve huysen looffsche wyse gemaeckt wordden sullen de mueren tusschen beyden van elcker woninge der selver looffven moeten opgemaeckt wordden binnen duergaende moet canteelen oft wynbergen anderhalven voet buyten den dake oft vorste vande selve wooninge ende dit al opde pene ende verbuerte vande selve houten stagien ende gevelen ofte oick de voorscreven mueren min dan voets dicke als vooren gemest [gemetst] zynde aff te moeten breecken ende daer en boven te vervallen inde pene van sestich carolus gulden eens d'een derdendeel daer aff den heere het tweede der stadt ende het derde tot behoeff vanden brandtmeesters deser stadt
Voorts vuyt consideratie ende redene als vooren zoo gebiedt men van s'heeren ende vander stadts weeghen dat alle houten stagien ende ghevelen van eenighe huysen oft loeffven binnen den voorscreven buyten mueren van deser stadt voorscreven staende oft begost zynde te maeckene nyet en sullen mogen vermaeckt vernyeut verrepareert ververscht oft anders gesustineert wordden maer selen moeten blyven in hunnen staet sulcx als die nu ter tyt zyn oft staen totter tyt toe die van selffs vergaen selen ende dit insgelycx op de pene als vooren
</main>
<end>
</end>